Kievi paralajmëron valë të re goditjesh ndaj sektorit energjetik rus

Autoritetet në Kiev paralajmërojin shtimin e operacioneve ushtarake kundër rafinerive ruse të naftës. Ky hap vjen si kundërpërgjigje ndaj asaj që kreu i shtetit ukrainas, Volodymyr Zelensky, e ka cilësuar si një transformim rrënjësor të taktikave ruse të bombardimeve ajrore. Gjatë një prononcimi për agjencinë e lajmeve Reuters, presidenti ukrainas theksoi se vendi i tij do të vijojë me sulmet ndaj pikave strategjike të energjisë në Rusi, duke i konsideruar ato burime kyçe financimi për makinën ushtarake të Moskës. Zelensky u kujdes të sqaronte se Kievi refuzon të ndjekë të njëjtën rrugë me Moskën sa i takon shënjestrimit të infrastrukturës civile, duke garantuar se popullsia civile dhe objektet e saj mbeten jashtë çdo fushate të tillë. Kreu i shtetit ukrainas bëri të ditur se strukturat e inteligjencës vendase kanë rënë në gjurmët e dokumenteve që dëshmojnë një qasje të re sulmesh nga ana e rusëve me afrimin e stinës së dimrit. Sipas pretendimeve të tij, në shënjestër mund të vihen rrugët, rrjeti logjistik, institucionet arsimore, spitalet dhe objektet e tjera publike. Sipas vlerësimeve të presidentit ukrainas, kjo strategji e re synon të gjenerojë terror psikologjik te qytetarët, duke nxitur një valë shpërnguljesh nga kryeqyteti dhe qendrat e tjera të mëdha urbane të vendit. Në momentin e publikimit të këtij raportimi nga agjencia Reuters, zyrtarë të Kremlinit nuk kishin dhënë ende ndonjë reagim zyrtar lidhur me këto akuza. Në krahun tjetër, diplomacia ruse u ka bërë thirrje shtetasve të huaj që të braktisin Kievin menjëherë, ndërkohë që ka theksuar se Moska do të vijojë goditjet, të cilat i konsideron si kundërpërgjigje ndaj inkursioneve ukrainase brenda territorit rus. Gjatë muajve të fundit, Ukraina ka shtuar ndjeshëm sulmet me dronë ndaj komplekseve të naftës në Rusi. Këto aksione janë justifikuar nga autoritetet në Kiev si një domosdoshmëri për të tkurrur të ardhurat dhe potencialin energjetik që Moska shfrytëzon për të ushqyer konfliktin. Këto zhvillime zhvillohen në një kohë kur të dyja palët ndodhen nën një ngarkesë të lartë në terren, ndërsa Ukraina po hyn në muajt e ftohtë të dimrit, periudhë gjatë së cilës çështja e energjisë mbetet pika më e ndjeshme e luftës.