Të mosdorëzuarit para fatit: Historia prekëse e 13-vjeçarit nga Gaza që luan futboll me protezë

Pavarësisht se humbi gjymtyrët e tij të djathta gjatë një bombardimi izraelit në vitin 2021, 13-vjeçari Salih Ahmed Hamid nga lagjja Shuxhaije në lindje të qytetit të Gazës ka zgjedhur të mos heqë dorë nga dashuria e tij më e madhe: futbolli. Ngjarja tragjike e vitit 2021 i dha një kthesë rrënjësore jetës së të riut. Përveç dhimbjes së humbjes së këmbës, ai u përball me sfida të mëdha në lëvizshmëri, duke u detyruar të mbështetet tek një protezë për të përballuar sfidat e përditshmërisë. Megjithatë, as pesha e plagëve dhe as vështirësitë fizike nuk mundën ta shuajnë pasionin e hershëm të Salihut për këtë sport, të cilin e ushtron që prej fëmijërisë. Sapo i jepet rasti, ai bashkohet me bashkëmoshatarët për të luajtur duke përdorur gjymtyrën artificiale. “Futbolli është një nga mënyrat për t’u kapur pas jetës”, rrëfen adoleshenti, i cili vazhdon të gjejë forca për të zbritur në fushë falë një proteze të ndërtuar në rrugë artizanale. Duke evokuar të kaluarën, Salihu kujton kohën kur ndiqte mësimet në shkollë dhe argëtohej pa u ndalur me shokët e tij. “Dikur luaja shumë mirë futboll. Tani mund të luaj vetëm në mënyrë të kufizuar me këtë protezë që përdor”, tregon ai me keqardhje. Në fjalët e tij reflektohet një shpresë e madhe për të ardhmen. Ai shpjegon se një pajisje mjekësore më e avancuar do t'i jepte liri më të madhe lëvizjeje dhe do t'i hapte rrugë rikthimit të plotë në sport. “Dëshira ime e vetme është të kem një protezë më të mirë dhe ta zhvilloj edhe më shumë futbollin tim”, thekson 13-vjeçari. Në mbështetje të djalit, babai i tij, Ahmed Hamid, dëshmon për ndryshimin drastik të realitetit familjar, duke kujtuar se para sulmit Salihu gëzonte një jetë të qetë prej fëmije, mes shkollës dhe lojërave. Sipas babait, i mitur ka nevojë urgjente për ndihmë të vazhdueshme mjekësore dhe terapi rehabilitimi, si dhe për një protezë funksionale që do t'ia kthente pavarësinë dhe do t'ia lehtësonte hapat e përditshëm. Statistikat alarmante të publikuara nga UNICEF-i dëshmojnë se mbi 11 mijë fëmijë në Rripin e Gazës kërkojnë trajtim afatgjatë dhe kujdes të specializuar, për shkak të pasojave të rënda fizike që u kanë gjymtuar fëmijërinë.