Operacion antiterror në Itali: Arrestohet 21-vjeçari, iu sekuestruan armë dhe manuale për prodhimin e bombave

Një 21-vjeçar me shtetësi italiane ka rënë në pranga në qytetin e Salernos, nën akuzat e rënda për zotërim të pajisjeve dhe dokumenteve që shërbejnë për krijimin e lëndëve shpërthyese me prapavijë terroriste, si dhe për armëmbajtje pa leje. I riu, i cili rezulton me precedentë të mëparshëm penalë për mashtrim dhe armëmbajtje ilegale, u neutralizua mbrëmjen e 2 tetorit nga efektivët e Digos të Salernos dhe Drejtorisë Qendrore të Policisë për Parandalimin, pas një urdhër-kontrolli të lëshuar nga organet e akuzës. Ky operacion u vu në lëvizje falë një informacioni të siguruar nga Aise, shërbimi sekret italian për sigurinë e jashtme. Sipas organit të akuzës, 21-vjeçari kishte shfletuar në rrjet manuale udhëzuese, informacione për armët dhe teknika të prodhimit të eksplozivëve, duke shfaqur gjithashtu interes për materiale propagandistike të organizatës terroriste Shteti Islamik. Autoritetet shtetërore bënë me dije se gjatë hetimeve paraprake janë siguruar prova që tregojnë se i pandehuri kishte manifestuar hapur dëshirën për të kryer akte dhune. Gjatë kontrollit të ushtruar në banesë, në sendet personale dhe në aparaturat elektronike, grupi hetimor ka zbuluar një sasi të madhe dokumentesh dhe udhëzuesish praktikë për ndërtimin dhe përdorimin e mjeteve shpërthyese artizanale dhe përzierjeve kimike. Sipas ekspertëve hetues, provat e sekuestruara dëshmojnë gjithashtu një orientim të theksuar drejt rrymave të radikalizmit islamik. Sekuestrohen thika, hanxharë, pistoleta dhe municione Në kuadër të kontrolleve, policia ka bërë të mundur sekuestrimin e dy thikave dhe një hanxharë me gjatësi afërsisht 50 centimetra. Në ambientet e kontrolluara u gjetën gjithashtu dy armë zjarri, konkretisht një pistoletë Colt dhe një revolver, të cilat nga verifikimet e para ishin prodhuar për fishekë manovër, por ishin modifikuar me mjete rrethanore për t'u shndërruar në armëfunksionale. Krahas tyre, u bë i mundur edhe sekuestrimi i 107 fishekëve manovër. Të gjitha provat materiale janë dërguar për analiza të specializuara teknike, ndërsa pajisjet digjitale dhe armët do t'i nënshtrohen ekzaminimeve të mëtejshme. Pas përfundimit të veprimeve procedurale, 21-vjeçari është ndaluar në flagrancë dhe është transferuar në institucionin e ekzekutimit të veprave penale në Fuorni, ku do të presë masën e sigurisë dhe hapat e mëtejshëm të procesit gjyqësor. Autoritetet italiane kanë paralajmëruar se hetimet do të vazhdojnë me intensitet për të zbuluar nëse i dyshuari ka pasur bashkëpunëtorë, kontakte apo plane konkrete që lidhen me kërkimet e tij në internet dhe materialet e rrezikshme të zbuluara.