Samadrexha tregon grintë, por i jep theksin e fundit rrugëtimit në Kupën Evropiane

Skuadra e Samadrexhës ka përfunduar paraqitjet e saj në edicionin e këtij viti të Kupës Evropiane për hendbolliste, duke u ndalur në fazën e raundit të dytë pas një ndeshjeje me rivalitet të lartë. Të shtunën në mbrëmje, në palestrën sportive "Afrim Bunjaku" në Samadrexhë, kampione e vendit tonë zhvilloi takimin e dytë përballë ekipit nga Ishujt Faroe, Neistin. Edhe pse sfida u karakterizua nga një luftë e fortë sportive nga minuta e parë e deri në atë të fundit, mysafirët arritën të triumfojnë me rezultatin e ngushtë 25:24. Duke qenë se kishin shënuar fitore edhe në ndeshjen e parë, skuadra nga Ishujt Faroe siguroi biletën për fazën e radhës. Në aspektin individual, forca kryesore e sulmit te Samadrexha ishte Amanda Abreu me 10 gola të shënuar, e ndjekur nga Aulona Maloku me katër realizime dhe Arona Krasniqi që kontribuoi me tri gola.