Triumfi historik 0-7 ndaj Kroacisë, Tuchel mbetet i habitur: E pashë orën dhe thashë 'Uau!'

Kombëtarja e Anglisë ka regjistruar një fitore spektakolare dhe tejet të thellë 0-7 në udhëtim ndaj Kroacisë në stadiumin “Rujevica” të Rijekës, takim ky i vlefshëm për xhiron e tretë të fazës së grupeve në Ligën e Kombeve. Pas përfundimit të këtij takimi, trajneri i “Tre Luanëve”, Thomas Tuchel, nuk e ka fshehur aspak entuziazmin për paraqitjen fantastike të skuadrës së tij, duke vënë në pah faktin se anglezët nuk e ulën aspak intensitetin e lojës as pasi fitorja tashmë dukej e sigurt. “Pasi arritëm epërsinë 3:0, ndoshta për tri minuta bëmë një gabim të madh dhe e humbëm topin lehtësisht disa herë. Por në përgjithësi ishte një paraqitje në nivel të lartë për të gjitha 90 minutat,” u shpreh fillimisht strategu gjerman. “Nga minuta e parë deri në të fundit, prej çdo lojtari që startoi e deri te ata që u futën nga banka rezervë, gjithçka ishte në nivelin më të lartë dhe e përgëzoj ekipin. Për një ndeshje në cilësinë e mysafirit, kjo ishte diçka jashtëzakonisht mbresëlënëse. Krijuam shumë raste dhe që nga fillimi ishim tejet të rrjedhshëm në lojën tonë,” shtoi ai. Tuchel ka ndarë edhe një moment interesant nga rrjedha e ndeshjes, duke treguar se si e përjetoi dominimin absolut të të përzgjedhurve të tij në fushën e blertë. “Mbaj mend se shikova orën dhe mendova: ‘Uau, këto ishin tri minutat e para shumë të mira.’ Pastaj e shikova përsëri dhe kishin kaluar shtatë minuta, të cilat gjithashtu ishin shumë të mira. Dhe kjo nuk u ndal më,” theksoi ai. Në fund, tekniku i Anglisë vlerësoi lart qasjen dhe karakterin e treguar nga futbollistët e tij gjatë gjithë sfidës. “Vazhduam ta mbanim ritmin, luajtëm në hapësirat e lira dhe ishim shumë efikasë. Qëndruam të uritur në presingun pas humbjes së topit dhe në mbrojtje, duke i bërë gjërat bazë siç duhet. Më pëlqeu qëndrimi i ekipit. Gjithmonë luajtëm me përulësi. Gjithmonë i bëmë gjërat bazë siç duhet dhe për këtë arsye ishte një paraqitje perfekte,” deklaroi Tuchel për ITV.