Hetimet në Korçë: Nishan te mjekja dhe drejtoresha e kopshtit pas shtrimit të gjashtë fëmijëve në spital me shenja helmimi

Autoritetet policore në Korçë kanë nisur procedimin penal ndaj dy personave, pas trajtimit mjekësor të gjashtë të miturve nga i njëjti institucion parashkollor, të cilët u paraqitën në spital me shqetësime të njëjta gastrointestinale. Sipas informacionit zyrtar nga blutë e Korçës, specialistët e Hetimit të Krimeve pranë Komisariatit lokal kanë nisur hetimet në gjendje të lirë për veprën penale të “Shpërdorimit të detyrës” ndaj një mjekeje 57-vjeçare, e cila shërben në pavijonin e Pediatrisë pranë Spitalit Rajonal, si dhe ndaj drejtoreshës 60-vjeçare të kopshtit ku edukoheshin fëmijët. Referuar njoftimit të policisë, procedimi nisi pasi gjatë pasdites së djeshme dhe ditës së sotme, gjashtë fëmijë nga e njëjta çerdhe kopshti kërkuan ndihmë mjekësore në spital, duke shfaqur simptoma identike të problemeve me stomakun. Sipas hetimeve paraprake, mjekja e pediatrisë dyshohet se nuk ka përmbushur detyrimin ligjor për të njoftuar organet e rendit lidhur me rastet e paraqitura për trajtim në ambientet spitalore. Nga ana tjetër, drejtoresha e institucionit edukativ akuzohet se ka shkelur detyrat funksionale lidhur me mangësitë në kontrollin dhe verifikimin e cilësisë së ushqimit që u është shërbyer të miturve. Aktualisht, ngjarja mbetet nënn hetim dhe autoritetet ende nuk kanë dhënë një konfirmim zyrtar nëse gjendja shëndetësore e fëmijëve është shkaktuar nga ndonjë helmim ushqimor apo për shkak të një viroze stinore. Materialet e plota procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Korçë, e cila do të ndjekë hapat e mëtejshëm ligjorë për zbardhjen e plotë të rrethanave.