A do ta shohim Negisa Didon në “Big Brother VIP”? Modelja thyen heshtjen

Modelja e njohur Negisa Dido ka qenë e ftuar së fundmi në emisionin “S’e Luan Topi”, moderuar nga Erjona Rusi. Gjatë kësaj interviste, ajo foli për rrugëtimin e saj në spektaklin “She’s on Top”, ku u shpall edhe fituese. Dido ndau me publikun detaje nga kjo përvojë, duke treguar se në fillim prindërit e saj ishin skeptikë dhe kundër pjesëmarrjes nga frika e një zhgënjimi të mundshëm, por më vonë i dhanë një mbështetje të madhe. Megjithatë, biseda mori një kthesë tjetër kur moderatorja Erjona Rusi e pyeti drejtpërdrejt rreth zërave se ajo do të jetë pjesë e edicionit të gjashtë të “Big Brother VIP Albania”. Duke iu përgjigjur pyetjeve rreth thashethemeve që qarkullojnë, Negisa pranoi se i ka parë emrin e saj të lakuar në media, por theksoi se nuk ka ende një përgjigje përfundimtare për këtë çështje. Ajo shtoi se e ka ndjekur gjithmonë këtë format televiziv që nga fëmijëria dhe shpesh e ka imagjinuar veten brenda shtëpisë më të famshme në vend. Sipas modeles, një eksperiencë e tillë kërkon maturi, durim të madh, guxim dhe korrektësi, ndërsa theksoi se ende nuk është e sigurt nëse ndihet plotësisht gati për një sfidë kaq të madhe, pavarësisht përfitimeve të shumta që ofron ky reality show.