Ademi nderon figurën e Afrim Prekazit: Kontributi i tij për futbollin kosovar do të mbetet i pashlyeshëm

Komuniteti sportiv në vend është tronditur thellë nga ndarja e parakohshme nga jeta e figurës së shquar të sportit vendor, Afrim Prekazi, i cili la pas një boshllëk të madh në futbollin kosovar. Lidhur me këtë humbje të rëndë, kreu i Federatës së Futbollit të Kosovës, Agim Ademi, i ka dërguar një telegram ngushëllimi familjes dhe të afërmve të të ndjerit. “Me pikëllim të thellë morëm lajmin për ndarjen nga jeta të më të dashurit tuaj, Afrim Prekazi, andaj në emrin tim personal dhe në emër të Komitetit Ekzekutiv të Federatës së Futbollit të Kosovës, ju shpreh ngushëllimet më të sinqerta,” thuhet në mesazhin e kreut të FFK-së. Ademi ka vënë in primis në pah përkushtimin e palodhur të Prekazit ndër vite, duke kujtuar angazhimin e tij si pjesë e komisioneve të Federatës së Futbollit të Kosovës, ku dha një kontribut të çmuar për mbarëvajtjen dhe zhvillimin e kësaj loje. Sipas tij, përmes pasionit dhe punës së palodhur, i ndjeri u bë pjesë e atyre personaliteteve që ndërtuan themelet dhe forcuan rrugëtimin e futbollit tonë, duke fituar respektin e padiskutueshëm të kolegëve dhe mbarë opinionit sportiv. “Në këto momente dhimbjeje, jemi pranë jush dhe ndajmë pikëllimin për humbjen e një njeriu që i shërbeu me përkushtim futbollit dhe Federatës së Futbollit të Kosovës,” ka shtuar më tej Ademi. Në përmbyllje të telegramit të tij, i pari i shtëpisë së futbollit kosovar ka theksuar se vepra e Afrim Prekazit do të kujtohet gjithmonë me mirënjohje të thellë, duke e mbyllur me urimin: “I lehtë i qoftë dheu i Kosovës!”