Vushtrri, i jepet lamtumira e fundit pas gati tri dekadash Adem Beqirit, viktimë e luftës

Pas një kalvari prej 27 vitesh pritjeje dhe ankthi, familja Beqiri i dha sot lamtumirën e merituar Adem (Muhamet) Beqirit, i cili u zhduk me dhunë gjatë periudhës së luftës në Kosovë. Sipas dëshirës së familjarëve, në fshatin Pantinë të Vushtrrisë u organizua ceremonia e rivarrimit të eshtrave të Adem Beqirit. Ai ishte rrëmbyer më 19 prill 1999 nga forcat serbe, në një ngjarje ku u zhdukën edhe 22 qytetarë të tjerë teksa po përpiqeshin të kalonin për në Mal të Zi. Beqiri bënte pjesë në grupin e njohur si “Grupi i Intelektualëve”, ku përfshiheshin mjekë, arsimtarë, profesorë dhe figura të shquara shoqërore. Zhdukja e tyre e dhunshme la plagë të thella dhe një pasiguri të madhe te familjet, të cilat me dekada pritën të mësonin të vërtetën për fatin e tyre. Mbetjet mortore të Adem Beqirit u lokalizuan në një varrezë masive në territorin e Zubin Potokut, ndërsa identifikimi zyrtar u arrit përmes analizes së ADN-së. Gjatë të njëjtit proces verifikimi, u bë i mundur edhe identifikimi i eshtrave të dy bashkudhëtarëve të tij të fatit, Idriz Rrecajt dhe Sali Mëziut. Në qytetin e Mitrovicës u organizua gjithashtu një Akademi Përkujtimore për të evokuar jetën, kontributin dhe veprën e Adem Beqirit. Të mbledhur aty, familjarë, miq dhe personalitete institucionale nderuan kujtimin e tij dhe u solidarizuan me dhimbjen e familjes. Gjatë kësaj dite homazhesh, u theksua mirënjohja e thellë për familjet e personave të zhdukur dhe shoqatat përkatëse, si dhe për të gjithë ekspertët e institucionet që kontribuuan në procesin e mundimshëm të gjetjes, identifikimit dhe kthimit të mbetjeve mortore. Nga ana e tij, Komisioni Qeveritar për Persona të Zhdukur riafirmoi angazhimin e palëkundur për të vazhduar kërkimet, në bashkëpunim të ngushtë me mekanizmat kompetentë, me qëllim zbardhjen e fatit të të gjithë personave që ende llogariten si të pagjetur nga lufta. Për familjen Beqiri, kjo ceremoni rivarrimi i jep fund një agonie 27-vjeçare, por njëkohësisht shërben si dëshmi e dhimbshme e plagës së hapur që vazhdon të prekë mijëra familje të tjera në vend. (Lajmet e Reja)