Valë pakënaqësie në Suedi: Mërgata shqiptare në Malmö proteston kundër vendimit të Speciales për ish-krerët e UÇK-së

Pakënaqësitë e mërgatës shqiptare ndaj vendimeve të Dhomave të Specializuara në Hagë janë shtrirë edhe në Suedi. Qytetarë të shumtë bashkatdhetarë janë organizuar në qytetin e Malmö-s për të kundërshtuar aktgjykimin dënues të shkallës së parë të dhënë ndaj ish-krerëve të Ushtrisë Çlirimtare të Kosovës. Të mbledhur në sheshet dhe rrugët kryesore të qytetit suedez, protestuesit kanë zhvilluar një marshim paqësor, të shoqëruar me mesazhe të qarta për drejtësinë dhe historinë. Ata kanë mbajtur lart pankarta ku spikatnin mbishkrimet "UÇK – Luftë për Liri", duke shprehur mbështetjen e palëkundur për të kaluarën e lavdishme të luftës çlirimtare. Sheshi u dominua nga ngjyrat kuq e zi dhe valëvitja e flamurit kombëtar shqiptar, teksa pjesëmarrësit shprehën indinjatën e tyre me vendimin e fundit të gjykatës, duke e cilësuar atë si të padrejtë ndaj figurave kyçe të UÇK-së.