Humbje e madhe për Policinë e Kosovës: Ndërron jetë zyrtari Enver Zogaj

Komuniteti i sigurisë në vend është tronditur nga lajmi për ndarjen nga jeta të zyrtarit policor, Enver Zogaj. Me këtë rast, Sindikata e Policisë së Kosovës ka përcjellë një mesazh ngushëllimi, duke iu drejtuar familjarëve, të afërmve, miqve dhe gjithë kolegëve të të ndjerit. Në mesazhin zyrtar të ngushëllimit, kjo sindikatë ka vlerësuar lart angazhimin dhe profesionalizmin e treguar nga Zogaj përgjatë gjithë karrierës së tij, duke veçuar përkushtimin e palodhur në mbrojtje të rendit dhe në shërbim të qytetarëve. “Me këtë rast, shprehim respektin dhe mirënjohjen tonë për kontributin dhe përkushtimin e tij në shërbim të qytetarëve dhe në përmbushjen e detyrës zyrtare”, theksohet ndër të tjera në telegramin e lëshuar për ketë rast. Në fund të njoftimit, Sindikata ka manifestuar solidaritet të plotë me familjen dhe kolegët e Zogajt, duke garantuar se figura dhe kujtimi për të do të mbeten përgjithmonë të paharruara në zemrat e atyre që punuan pranë tij.