Ngërçi institucional në fokus: Kurti dhe Abdixhiku mbyllin takimin në Kuvend

Kryeministri Albin Kurti dhe kreu i Lidhjes Demokratike të Kosovës, Lumir Abdixhiku, kanë mbajtur ditën e sotme një takim zyrtar, punimet e të cilit tashmë janë përmbyllur. Në qendër të këtij takimi ka qenë procesi i zgjedhjes së presidentit të vendit, një çështje kjo që ka prodhuar një ngërç të thellë institucional, për zgjidhjen e së cilës po kërkohet konsensus mes forcave politike. Ndërkaq, shefi i ekzekutivit pati një takim të ngjashëm edhe një ditë më parë me kryetarin e Partisë Demokratike të Kosovës, Bedri Hamza. Ky i fundit u shpreh gjatë ditës së sotme se një takim tjetër me kryeministrin Kurti mund të ndodhë në çdo moment, duke marrë parasysh dinamikën e zhvillimeve aktuale politike.