Ndryshimet për Gjykatën Speciale, Gruda sqaron kufizimin e juridiksionit të Dhomës Kushtetuese në Hagë

Deputeti i Partisë Demokratike të Kosovës, Përparim Gruda, ka dhënë detaje sqaruese lidhur me nismën për ndryshimet e propozuara në Ligjin për Gjykatën Speciale, duke theksuar se ato i heqin Dhomës së Specializuar të Gjykatës Kushtetuese në Hagë çdo kompetencë për të ushtruar kontroll mbi kushtetutshmërinë e ligjit. Sipas shpjegimit të tij, e drejta për të bërë këtë kontroll do t'i takojë ekskluzivisht Gjykatës Kushtetuese të Republikës së Kosovës, e cila ushtron funksionin e saj në Prishtinë. Gruda ka bërë të qartë se Dhoma e Hagës humbet çdo juridiksion për të vlerësuar apo për të shfuqizuar aktin ligjor në fjalë. “Po shoh shumë reagime lidhur me mundësinë që, pas miratimit të ndryshimeve në Ligjin për Gjykatën Speciale, ligji të dërgohet në Dhomën e Specializuar të Gjykatës Kushtetuese në Hagë dhe eventualisht të shfuqizohet. Po e sqaroj: me ndryshimet që kemi propozuar në ligj, Dhomës së Specializuar të Gjykatës Kushtetuese i është hequr shprehimisht kompetenca për kontrollin e kushtetutshmërisë së ligjit, në çfarëdo forme”, ka deklaruar ndër të tjera ai. Tutje, deputeti ka sjellë në vëmendje Amendamentin nr. 24 të Kushtetutës, i cili përcakton se një Dhomë e Specializuar e Gjykatës Kushtetuese, e përbërë nga tre gjyqtarë ndërkombëtarë të shtuar krahas atyre ekzistues sipas Nenit 114 (1), vendos vetëm mbi referimet kushtetuese të Nenit 113 që lidhen me Dhomat e Specializuara dhe Zyrën e Prokurorit të Specializuar, gjithnjë konform ligjit të veçantë. Duke u mbështetur në këtë bazë ligjore, Gruda ka bërë me dije se neni 23 i projektligjit të ri e përcakton prerazi kufirin e veprimit për Dhomën Kushtetuese në Hagë. Kjo dispozitë përcakton se ajo ka të drejtë të vendosë vetëm për referimet kushtetuese që dalin nga vendimet, urdhrat apo aktgjykimet e Dhomave të Specializuara dhe Prokurorisë së Specializuar, ndërsa thekson qartë se nuk ka juridiksion për kontroll abstrakt, paraprak, konkret apo incidental të kushtetutshmërisë së ligjeve, përfshirë Ligjin Nr. 05/L-053. Për të shmangur çdo paqartësi të mundshme, neni 23 saktëson gjithashtu se vlerësimi i kushtetutshmërisë së këtij ligji, si dhe i çdo amendamenti që e ndryshon, plotëson apo shfuqizon atë, mbetet në dorë të Gjykatës Kushtetuese në Prishtinë, në përbërjen e saj të rregullt, në përputhje të plotë me nenin 113 të Kushtetutës. Në këtë linjë, Gruda përfundoi se Dhoma Kushtetuese në Hagë nuk paraqet një institucion të ndarë kushtetues, por mbetet një Dhomë e Specializuar me kompetenca të kufizuara, ndërsa e gjithë përgjegjësia për kontrollin kushtetues të akteve të Kuvendit mbetet ekskluzivisht te Gjykata Kushtetuese në Prishtinë.