Talenti 17-vjeçar i Bayern Munichu-t shkëlqen me Kombëtaren, Gashi tregon vlera të larta lideri

Pavarësisht moshës së tij të re prej vetëm 17 vitesh, qendërmbrojtësi i talentuar Afrim Gashi po dëshmon aftësi të jashtëzakonshme, duke marrë madje edhe rolin e udhëheqësit në fushë. Ai aktivizohet aktualisht me skuadrën e Bayern Munich U19, ndërsa së fundmi ka bërë një hap të rëndësishëm në karrierën kuqezi, duke kaluar nga Përfaqësuesja U17 e Shqipërisë te ajo U19. Në ndeshjen miqësore të zhvilluar ditën e djeshme kundër Lituanisë, e cila u mbyll me fitoren 2:1 në favor të Shqipërisë, Gashi ka regjistruar debutimin e tij si titullar me grupmoshën U19. Pas këtij hapi të rëndësishëm, mbrojtësi ka ndarë emocionet e tij me ndjekësit në rrjetet sociale gjatë ditës së sotme, duke shprehur entuziazmin për avancimin e tij në radhët e Kombëtares. "I lumtur të jem këtu", ka qenë mesazhi i shkurtër por domethënës i shpërndarë nga Afrim Gashi.