Ndryshimet për Gjykatën Speciale para sfidës kohore, Cakolli tregon skenarin e Kuvendit deri më 6 tetor

Pas miratimit të opinionit zyrtar nga Qeveria lidhur me Projektligjin për plotësim-ndryshimin e Ligjit për Dhomat e Specializuara, Kuvendi i Kosovës ka tashmë dritën jeshile për të vijuar me procedurat e shqyrtimit. Megjithatë, eksperti Eugen Cakolli nga Instituti Demokratik i Kosovës (KDI) vlerëson se orari i ngjeshur deri në datën 6 tetor lë hapësirë shumë të ngushtë për finalizimin e këtij procesi. Duke analizuar hapat e domosdoshëm institucionalë, Cakolli ka bërë të ditur se pas shpërndarjes së dokumentacionit të plotësuar te ligjvënësit më 3 tetor, radha i takon Komisionit për Legjislacion që të bëjë shqyrtimin në parim, përpara se nisma të kalojë në seancë plenare. Për të iniciuar një procedurë të përshpejtuar, nevojitet kërkesa formale nga së paku 30 deputetë ose nga vetë ekzekutivi, ndërsa tejkalimi i afateve të rregullta kërkon propozimin e gjashtë deputetëve dhe mbështetjen e dy të tretave të trupit ligjvënës të pranishëm. Edhe në rast se ndiqet rruga e përshpejtuar, rregulloret kërkojnë respektimin e disa afateve minimale, duke përfshirë 48 orë nga dorëzimi i materialeve deri te leximi i parë, si dhe 72 orë nga miratimi në parim deri te shqyrtimi i dytë. Sipas kësaj llogaritjeje, seanca për shqyrtimin e parë mund të mbahet më herët më 5 tetor, ndërkohë që faza e dytë dhe votimi përfundimtar nuk mund të ndodhin para datës 8 tetor. Eksperti i KDI-së kujton gjithashtu se pas votimit në Kuvend, akti ligjor i dërgohet Presidentit për dekretim dhe hyrje në fuqi, proces ky që i nënshtrohet afateve shtesë. Ai shton se pavarësisht shkurtimit të mundshëm të kohës, çdo ligj ruan prezumimin e kushtetutshmërisë derisa Gjykata Kushtetuese të thotë fjalën e saj. Në fund, Cakolli thekson se një grup prej të paktën 10 deputetësh ruan të drejtën për ta dërguar këtë ligj në Gjykatën Kushtetuese brenda një afati tetëditor nga miratimi, duke kontestuar qoftë përmbajtjen apo aspektin procedural. Në një skenar të tillë, shpallja e aktit mbetet e pezulluar derisa të merret një vendim përfumdimtar nga kjo gjykatë.