Mitrovicë, nderohen tre viktimat e luftës pas 27 vitesh pritjeje: Haxhiu bën thirrje për drejtësi dhe zbardhjen e fatit të të zhdukurve

Ushtruesja e detyrës së Presidentes, Albulena Haxhiu, ka marrë pjesë këtë të premte në mbledhjen komemorative të mbajtur në Qendrën e Kulturës “Rexhep Mitrovica” në Mitrovicë. Ngjarja i kushtohej kujtimit të Adem Beqirit, Idriz Rrecajt dhe Salih Mëziut, identiteti i të cilëve u konfirmua pas afro tri dekadash kërkimesh. Procesi i gërmimeve në lokacionet e Kalludërit dhe Jabukës, i shoqëruar me analizat e ADN-së, bëri të mundur identifikimin zyrtar të tre anëtarëve të njohur si pjesë e “Grupit të Intelektualëve”. Në një reagim lidhur me këtë ngjarje prekëse, Haxhiu u shpreh se pas 27 vitesh ankthi dhe kërkimesh të pandërprera, familjarët e tyre morën më në fund një përgjigje përfundimtare për fatin e njerëzve të tyre të dashur. Gjatë fjalës së saj, ajo kërkoi intensifikimin e përpjekjeve për gjetjen e 20 pjesëtarëve të tjerë të këtij grupi, si dhe të të gjithë personave të zhdukur me dhunë gjatë konfliktit, duke nënvizuar se familjet e tyre kanë të drejtë të mësojnë të vërtetën dhe se krimet e kryera në kohë lufte kërkojnë ndëshkimin e merituar përmes drejtësisë.