Mitrovicë, nderohen tre viktimat e luftës pas 27 vitesh pritje: Haxhiu kërkon drejtësi dhe zbardhjen e fatit të të zhdukurve

Ushtruesja e detyrës së Presidentes, Albulena Haxhiu, ka marrë pjesë këtë të shtunë në akademinë përkujtimore të mbajtur në Qendrën e Kulturës “Rexhep Mitrovica” në Mitrovicë. Ngjarja i ka kushtuar kujtimit të Adem Beqirit, Idriz Rrecajt dhe Salih Mëziut, identiteti i të cilëve është konfirmuar së fundmi pas gati tri dekadash kërkimesh. Sipas njoftimit zyrtar, përmes gërmimeve të kryera në lokacionet Kalludër dhe Jabukë, të mbështetura nga analizat e ADN-së, u bë i mundur identifikimi përfundimtar i tre anëtarëve të të ashtuquajturit “Grup i Intelektualëve”. Në një reagim të publikuar me këtë rast, Haxhiu ka theksuar rëndësinë e këtij momenti për të afërmit e tyre. “Pas 27 vjetësh kërkimi, familjet e tyre më në fund morën përgjigje për fatin e më të dashurve të tyre”, u shpreh ajo. Gjatë fjalës së saj, ajo bëri thirrje për intensifikimin e përpjekjeve, duke kërkuar që kërkimet të vijojnë si për 20 anëtarët e tjerë të këtij grupi, ashtu edhe për çdo person tjetër të zhdukur me dhunë gjatë periudhës së luftës. Haxhiu theksoi se familjet e viktimave kanë të drejtë të mësojnë të vërtetën dhe se institucionet duhet të sigurojnë vendosjen e drejtësisë për krimet e kryera.