Dëmshpërblim milionësh për ish-pastruesen pas sulmit brutal nga qeni i Chris Brown

Ish-pastruesja e artistit të njohur Chris Brown, Maria Avila, ka siguruar një dëmshpërblim prej 9.5 milionë dollarësh, pas një incidenti të rëndë ku u sulmua nga kafsha shtëpiake e këngëtarit në rezidencën e tij në Tarzana të Kalifornisë, ngjarje kjo e regjistruar në vitin 2020. Në fazën e parë të procesit, një juri vendosi që Avilës t'i takonin 12.9 milionë dollarë si kompensim. Megjithatë, ky vendim u rishqyrtua nga gjyqtari Huey P. Cotton, i cili e cilësoi shifrën si tepër të lartë dhe i la mundësinë asaj të pranonte një shumë të reduktuar ose të hynte në një proces të ri gjyqësor për rigjykimin e dëmeve. Për të shmangur një betejë tjetër të gjatë ligjore, Avila vendosi të pranojë shifrën e modifikuar. Sipas të dhënave zyrtare të gjykatës, ky kompensim përfshin 3.85 milionë dollarë për dëmet jopasurore të shkuara, 5.4 milionë dollarë për ato të ardhshme, si dhe 250 mijë dollarë të destinuara për shpenzimet mjekësore. Ngjarja tronditëse ndodhi më 12 dhjetor 2020, në kohën kur Avila po kryente detyrat e saj në pronën e Brown. Ajo ka dëshmuar se kafsha, një qen bari kaukazian me një peshë prej rreth 90 kilogramësh, iu vërsul asaj duke i shkaktuar plagë të rënda në fytyrë dhe krahë, të cilat i lanë shenja të pashlyeshme. Edhe pse gjyqtari vlerësoi se kishte fakte të mjaftueshme për të provuar dhimbjen e vazhdueshme dhe traumat emocionale të pësuara, ai konstatoj se mungonin provat e plota për disa nga dëmet e përhershme nervore që ishin përfshirë në kalkulimet e para të jurisë. Në anën tjetër, Patricia, motra e Maria Avilës e cila ndodhej e pranishme gjatë incidentit dhe shërbeu si dëshmitare, është shpërblyer veçmas me një dëmshpërblim prej 885 mijë dollarësh, vendim ky që ka mbetur i panjollosur dhe në fuqi. Me praninë e marrëveshjes përfundimtare për shifrën prej 9.5 milionë dollarësh, kjo çështje ligjore për kompensimin e dëmeve të Maria Avilës mbyllet përfundimisht, duke shmangur çdo mundësi për një gjykim tjetër.