Prapaskenat e çuditshme: Marrëdhënia e ftohtë mes Mbappes dhe Dembeles nuk është rregulluar

Përtej deklaratave paqësore dhe buzëqeshjeve para kamerave, fërkimet mes Kylian Mbappes dhe Ousmane Dembeles duket se vazhdojnë të mbeten prezente brenda kampit të Kombëtares së Francës. Sipas burimeve mediatike franceze, tensioni mes dy yjeve të futbollit ka burimin te zhvillimet dhe dinamikat rreth garës prestigjioze për “Topin e Artë”, një situatë që kishte krijuar siklet mes tyre. Në rrafshin publik, Mbappe kishte tentuar t'i ulte tonet, duke pohuar se kishte biseduar me bashkëkombësin e tij dhe se çdo gjë ishte në rregull, pa asnjë lloj konflikti. Në të njëjtën gjatësi vale u deklarua edhe Dembele, i cili zgjodhi të mos u jepte hapësirë të ashtuquajturave “lufta të vogla në rrjetet sociale”, duke theksuar se vëmendja e tij e vetme ishte fusha e blertë. Megjithatë, realiteti në prapaskenë del të jetë krejtësisht ndryshe nga fasada publike. Raportohet se para se futbollistët të bashkoheshin në Clairefontaine, ata nuk kishin zhvilluar asnjë bashkëbisedim sy më sy. Raportimet tregojnë se mes tyre kishte qarkulluar vetëm një mesazh i vetëm, i cili kishte mbetur pa përgjigje, duke lënë shenja në raportin ndërpersonal të dy sulmuesve. Madje, Mbappe thuhet se ka mbetur i habitur nga qasja e Dembeles gjatë grumbullimit, pasi nuk e kishte pritur që pakënaqësitë e mëparshme të vazhdonin të ndikonin te bashkëlojtari i tij. Në shenjë ndryshimi të dinamikave, gjatë seancave stërvitore dhe grumbullimit, Mbappe është vënë re më pranë mesfushorit anësor Michael Olise. Pavarësisht përpjekjeve për të dhënë imazhin e një grupi të bashkuar dhe pa probleme, faktet tregojnë se lidhja mes Mbappes dhe Dembeles ende nuk i është rikthyer harmonisë së mëparshme.