Trazirat në Francë: Qeveria paralajmëron se protestat e nxënësve kanë degjeneruar në dhunë dhe shkelje të rendit

Vala e protestave të nxënësve të shkollave të mesme në Francë ka marrë një kthesë të rrezikshme, duke u shndërruar në akte të hapura të prishjes së rendit publik. Ky shqetësim është bërë i ditur nga ministri francez i Drejtësisë, Gérald Darmanin, pas përleshjeve të dhunshme që ndodhën mes forcave të rendit dhe demonstruesve në disa qytete të vendit. Sipas shifrave zyrtare të bëra publike nga ai, trazirat kanë përfshirë më shumë se 730 nga rreth 3700 shkolla në mbarë territorin francez. Gjatë tubimeve, nxënësit kanë ndezur zjarr dhe kanë hedhur bomba molotov në drejtim të policisë, e cila është kundërpërgjigjur duke përdorur gaz lotsjellës. Protestuesit po kërkojnë kushte më të mira në sistemin arsimor, duke denoncuar mungesën e stafit pedagogjik, mbitensionin e klasave me nxënës dhe infrastrukturën e amortizuar të shkollave. Në një prononcim lidhur me situatën, ministri i Brendshëm Laurent Nuñez njoftoi se vetëm gjatë ditës së premte janë vënë në pranga mbi 1700 persona. Duke theksuar se situata po anon rrezikshëm drejt kaosit dhe dhunës në mjediset urbane, ai garantoi se autoritetet po angazhojnë të gjitha kapacitetet e nevojshme për t'i dhënë fund kësaj situate. Nga ana e tij, ministri i Arsimit Édouard Geffray vuri në dukje se lëvizja ka dalë tashmë nga kontrolli i vetë nxënësve. Ai bëri me dije se deri në këto momente, të paktën 65 anëtarë të trupës mësimore kanë pësuar lëndim si pasojë e dhunës. Kujtojmë se këto protesta nisën fillimisht javën e kaluar në kryeqytetin Paris, por brenda një kohe të shkurtër janë zgjeruar në qytete të tjera kyçe si Montpellier, Nantes, Marseille dhe Strasbourg.