Hamza në Këshillin Drejtues të PDK-së: Mbrojtja e çlirimtarëve dhe e së vërtetës historike, prioritet kombëtar

Kreu i Partisë Demokratike të Kosovës, Bedri Hamza, gjatë fjalës së tij në mbledhjen e Këshillit Drejtues të kësaj partie, ka kërkuar reagim të menjëhershëm nga institucionet vendore pas vendimit të 16 shtatorit të marrë në Hagë. Sipas Hamzës, angazhimi për mbrojtjen e ish-krerëve të Ushtrisë Çlirimtare të Kosovës, si dhe hedhja poshtë e çdo narrative që tenton të tjetërsojë të vërtetën e luftës, duhet të vendosen në krye të agjendës shtetërore dhe partiake. “Hashim Thaçit, Kadri Veselit, Jakup Krasniqit, Rexhep Selimit dhe bashkëluftëtarëve të tyre u është bërë një padrejtësi e madhe. Aktgjykimi ndaj tyre është i padrejtë, i papranueshëm dhe i ndikuar politikisht. Përgjegjësia jonë e parë është që të mos i lëmë vetëm”, u shpreh ai para anëtarëve të Këshillit Drejtues. Ai theksoi gjithashtu se mbështetja ndaj tyre do të vazhdojë në kuadër të kornizave ligjore dhe institucionale, me qëllim që t'u sigurohet asistenca më cilësore juridike në fazat vijuese të këtij procesi gjyqësor. Duke analizuar peshën e këtij vendimi, Hamza vuri në dukje se ai mbart pasoja të rënda politike dhe historike, të cilave Kosova duhet t'ukundërvihet përmes argumenteve, dokumentacionit zyrtar, veprimit institucional dhe diplomacisë. “UÇK-ja dhe Perëndimi ishin aleatë në vitin 1999. Shtetet e Bashkuara të Amerikës, NATO-ja dhe aleatët tanë perëndimorë ishin pjesë e përpjekjes së përbashkët që i dha fund luftës dhe hapi rrugën për lirinë e Kosovës. Prandaj, çdo deformim i historisë së luftës sonë prek edhe historinë e kësaj aleance”, shtoi ai. Lidhur me projektligjin e inicuar nga PDK, lideri i kësaj partie sqaroi se nisma synon qartësisht vetëm rishikimin e mandatit të Dhomave të Specializuara dhe jo shuarjen e tyre. Propozimi legjislativ përfshin transferimin e çështjeve që dalin jashtë suazave të pretendimeve të raportit të Dick Martyt në sistemin vendor të drejtësisë, bashkë me dokumentacionin dhe provat përkatëse. Ndër të tjera, Hamza bëri të ditur se ky draft-ligj parasheh edhe përfshirjen e organizatave ndërkombëtare të pavarura për të monitoruar standardet e gjykimit, kohëzgjatjen e procedurave, trajtimin në paraburgim dhe respektimin e të drejtave fundamentale. Ai qartësoi se kjo nismë nuk ndërhyn në dinamikën aktuale të gjykimit, e cila do të vijojë sipas procedurave deri në epilogun përfundimtar të Apelit. “Tani duhet të veprohet edhe si shtet. Kuvendi duhet ta bëjë pjesën e vet. Qeveria duhet ta bëjë pjesën e vet. Edhe PDK do ta bëjë pjesën e vet”, u shpreh i prerë ai. Në mbyllje të fjalës së tij, kryetari i PDK-së i bëri thirrje qytetarëve për bashkim dhe mobilizim masiv në protestën e cila do të organizohet më 1 tetor në kryeqytet, duke filluar nga ora 16:00. “Le ta ngrisim bashkë zërin kundër padrejtësisë më 1 tetor”, ishte apeli i tij. Vlen të theksohet se kjo mbledhje e Këshillit Drejtues të PDK-së nisi me mbajtjen e një minute heshtje, në shenjë respekti dhe nderimi për jetën dhe veprimtarinë e figures së shquar, humanistes dhe intelektuales Flora Brovina, e cila ndërroi jetë ditë më parë.