Nisma e OVL UÇK-së: Kërkohet ndryshimi ligjor për të parandaluar rigjykimin e çështjeve të mbyllura

Organizata e Veteranëve të Luftës së Ushtrisë Çlirimtare të Kosovës i është drejtuar zyrtarisht Kuvendit të Kosovës me një kërkesë urgjente. Bëhet fjalë për futjen e një amendamenti specifik në kuadër të Projektligjit për Plotësimin dhe Ndryshimin e Ligjit për Dhomat e Specializuara. Sipas kërkesës së OVL UÇK-së, ky ndryshim synon të ndalojë prerazi rigjykimin e rasteve dhe procedurave për të njëjtat rrethana dhe fakte thelbësore, nëse ato janë gjykuar më parë e marrë formë të prerë nga Tribunali Penal Ndërkombëtar për ish-Jugosllavinë, EULEX-i, UNMIK-u apo instanca të tjera gjyqësore kompetente. Në argumentimin e saj, organizata thekson se një hap i tillë është i domosdoshëm për të garantuar sigurinë juridike dhe për të respektuar parimin universal “ne bis in idem”, i cili mbron një individ nga ekspozimi ndaj ndjekjes penale dy herë për të njëjtat vepra që tashmë kanë një vendim përfundimtar. Në dokumentin e dorëzuar, OVL UÇK përmend gjithashtu rastin e ish-krerëve të UÇK-së, duke pretenduar se ata po përballen me dënime të shkallës së parë për çështje që, sipas vlerësimit të tyre, janë trajtuar në të kaluarën nga mekanizmat drejtësisë vendore dhe ndërkombëtare. Gjithashtu, organizata kërkon që modifikimi i kualifikimit ligjor apo ndryshimi i terminologjisë së akuzave të mos përdoret si mekanizëm për të rivënë në lëvizje fakte dhe rrethana që tashmë janë shqyrtuar plotësisht dhe kanë marrë epilog përfundimtar gjyqësor. Në fund, OVL UÇK u ka bërë thirrje të hapur ligjvënësve dhe Kuvendit të Kosovës që ta marrin seriozisht këtë shqetësim dhe ta përfshijnë këtë garanci ligjore përmes një dispozite të posaçme në ndryshimet e reja të ligjit.