“Talent i rrallë, duhet trajtim ndryshe” – Legjenda e Juventusit thur eloge për Edon Zhegrovën

Ish-sulmuesi i njohur i Juventusit, Fabrizio Ravanelli, ka thurur eloge për Edon Zhegrovën, duke vlerësuar se ylli kosovar posedon aftësi të jashtëzakonshme dhe se ai meriton një qasje më të lirë e tolerante në fushën e gjelbër për shkak të rreziqeve që ndërmerr. Në një paraqitje të tij në podcastin e njohur të YouTube, Ravanelli ka diskutuar mbi profilin e Zhegrovës, duke zbuluar gjithashtu detaje nga bisedat e zhvilluara me trajnerin Luciano Spalletti lidhur me mundësitë e shfrytëzimit të potencialit të anësorit kosovar. Duke qenë se e njeh nga afër teknikun italian, Ravanelli ka argumentuar se Zhegrova kërkon një trajtim të personalizuar, i cili i përshtatet natyrës së tij shpërthyese dhe ambicjes për të qenë gjithmonë vendimtar për skuadrën. “Kam qenë gjithmonë i magjepsur pas Zhegrovës. Jam përfshirë në diskutime të shumta me Spallettin për mënyrën se si duhet përdorur ai në fushë”, ka deklaruar Ravanelli. Ai ka shtuar se pavarësisht natyrës kërkuese të trajnerit italian, lojtarë të kalibrit të Zhegrovës duhet të lihen më të çlirët, pasi dhuntitë e tyre legjitimojnë edhe ndonjë mangësi të vogël në fazën defensive. Analiza e ish-sulmuesit shtrihet edhe tek natyra e gabimeve të lojtarit, duke i cilësuar ato si kosto normale të guximit për të krijuar rrezik dhe për të bërë diferencën në fushë. “Nëse ai humb topa, kjo ndodh sepse guxon vazhdimisht. Në Serie A shoh shumë lojtarë që thjesht e kthejnë topin prapa; me atë stil do të mund të luaja edhe unë sot në moshën 58-vjeçare”, ka u shpreh ndër të tjera ish-legjenda e torinezëve. Këto komente vijnë në një kohë kur debatet rreth hapësirave dhe rolit të Zhegrovës mbeten aktuale, teksa Ravanelli këmbëngul se natyra e tij krijuese kërkon liri absolute dhe mirëkuptim për riskun që sjell në lojë.