Zëri i Kosovës në sheshe: Pse protestat e Prishtinës janë manifestim i dinjitetit dhe drejtësisë

Prej 17 ditësh, mijëra të rinj dhe qytetarë të Kosovës mbushin çdo ditë dhe natë sheshet për të protestuar kundër dënimeve të katër ish-drejtuesve të Ushtrisë Çlirimtare të Kosovës në Hagë. Pavarësisht përpjekjeve të dy partive të dala nga lufta, PDK-së dhe AAK-së, për t'i manipuluar këta protestues dhe për t'i orientuar kundër qeverisë së Albin Kurtit, një skenar i tillë rrezikon t'i japë fund vetë shpirtit të protestës. Në thelb, kjo nuk është një revoltë kundër qeverisë, por një manifestim i qartë i dinjitetit, integritetit dhe vitalitetit të popullit dhe rinisë kosovare kundër padrejtësisë ndaj Serbisë. Ndonëse në mesin e dhjetëra mijëra qytetarëve ka mbështetës të dy subjekteve politike të përmendura, shumica dërmuese e tyre nuk janë të zemëruar as me Gjykatën Speciale e aq më pak me qeverinë, por me padrejtësinë e hapur. Kjo padrejtësi merr përmasa alarmante kur krahasohet dënimi prej 81 vitesh heqje lirie për katër ish-krerët e UÇK-së me dënimet shumë më të lehta të dhëna për kriminelët e luftës serbe, të cilët kryen krime kundër njerëzimit dhe gjenocid ndaj shqiptarëve. Ndjekja penale njëetnike e ish-luftëtarëve të UÇK-së përbën një shkelje flagrante që favorizon agresorin dhe ndëshkon viktimën, e cila është vetë Kosova. Përmes kësaj vale protestash, shqiptarët e Kosovës dhe sidomos rinia po i dërgojnë një mesazh të prerë ndërkombëtarëve se çdo ide për pajtim me Serbinë mbetet e pamundur, për sa kohë ajo heziton të dënojë dhe ndëshkojë mijëra krime, vrasje dhe dhunime të kryera ndaj shqiptarëve. Vendimi i Gjykatës i datës 16 shtator 2026 ka shërbyer si një pikë kthese që ka bashkuar shqiptarët rreth konsensusit se paqja dhe pajtimi me Beogradin nuk mund të arrihen, sidomos kur bashkësia ndërkombëtare përpiqet të mbrojë imazhin e Serbisë ndërsa njollos atë të Kosovës. Kjo revoltë popullore po zhvillohet në një periudhë kritike, kur disa qarqe euroatlantike flasin për ringjalljen e një Jugosllavie të re, kur mazhoranca në parlamentin e Shqipërisë refuzon të klasifikojë masakrat serbe si gjenocid, dhe kur figura publike si Baton Haxhiu u bëjnë thirrje shqiptarëve të harrojnë krimet e Serbisë. Protestuesit po përcjellin mesazhe të qarta kundër çdo kompromisi shtesë me Serbinë gjenocidiale, duke u dhënë njëkohësisht një sinjal qortimi edhe atyre politikanëve vendorë që votuan krijimin e Gjykatës Speciale, por refuzuan të miratojnë një rezolutë për dënimin e gjenocidit serb. Këto protesta në Prishtinë nuk synojnë vetëm lirimin e Hashim Thaçit, Kadri Veselit, Jakup Krasniqit dhe Rexhep Selimit, por kërkojnë çlirimin e vetë perspektivës së bllokuar të Kosovës, rishqyrtimin e pozicionit të Bashkimit Evropian ndaj integrimit të vendit, si dhe anëtarësimin në NATO, çështje kjo e ngritur edhe nga kryeministri Kurti përballë presidentit Donald Trump. Këto tubime dëshmojnë se durimi i shqiptarëve ka mbërritur në fund përballë lojërave që synojnë shtyerjen pafundësisht të njohjes përfundimtare të shtetësisë së Kosovës, duke u shndërruar në një shuplakë të fortë për të gjithë kompromisaxhinjtë.