Procesi i integrimit: Më 13 tetor mbahet Konferenca e radhës Shqipëri-BE, synohet mbyllja e Kapitullit 20

Rrugëtimi i Shqipërisë drejt Bashkimit Evropian shënon një tjetër zhvillim të rëndësishëm. Më 13 tetor është parashikuar të zhvillohet konferenca e radhës ndërqeveritare mes palës shqiptare dhe bllokut evropian, ku fokusi do të jetë te përmbyllja e një kapitulli të ri negociator. Burime konfidenciale bëjnë me dije se gjatë këtij takimi të rëndësishëm pritet të mbyllet zyrtarisht Kapitulli 20, i cili fokusohet tek “Ndërmarrjet dhe Politikat Industriale”, duke shënuar kështu një hap para në përmbushjen e standardeve evropiane. Ky takim i nivelit të lartë do të zhvillojë punimet e tij në Bruksel, ndërsa në qendër të delegacionit shqiptar pritet të jetë i pranishëm kryeministri Edi Rama, për të ndjekur nga afër ecurinë e procesit.