Pocognoli shfaqet i qetë në Shkup: S'ka presion, synojmë triumfin e parë ndaj Maqedonisë së Veriut

Trajneri i përfaqësueses së Skocisë, Sebastien Pocognoli, ka shprehur besim të plotë se skuadra e tij mund të arrijë fitoren e parë nën drejtimin e tij gjatë duelit si mysafir kundër Maqedonisë së Veriut, takim ky që do të zhvillohet në stadiumin “Todor Proeski” në kryeqytetin maqedonas. Deri më tani, nën drejtimin e teknikut të ri, skocezët kanë siguruar vetëm një pikë dhe nuk kanë arritur të gjejnë rrugën e rrjetës në dy sfidat e para të Ligës B në Ligën e Kombeve. Pasi barazuan pa gola në transfertën ndaj Sllovenisë, ata pësuan një humbje të rëndë 3:0 në shtëpi përballë Zvicrës. I pyetur nga gazetarët në konferencën për shtyp në Shkup nëse ndien ndonjë barrë apo tension për rezultatet, Pocognoli u përgjigj prerë: “Presion? Jo, sepse ndiejmë vetëm sfidën për të qenë më të mirë nga ndeshja në ndeshje. Duhet të ecim hap pas hapi. Sigurisht, duam që ky grumbullim të jetë vërtet pozitiv në fushë. Sa i përket ngjitjes në Ligën A, kjo është një objektiv për ne, por mendoj se është e rëndësishme që lojtarët ta marrin fitoren e parë, në mënyrë që gjithçka të marrë kuptim. Fitorja të jep liri në fushë për të marrë vendime dhe e përshpejton procesin. Nëse do t’i kishim marrë tri pikët në Slloveni, gjë që mendoj se e merituam, ndoshta do të flisnim ndryshe”. Strategu skocez la të kuptohet se nuk pritet të ketë ndryshime rrënjësore nëmbledhjen e titullarëve për këtë fundjavë, kjo edhe për faktin se ndëshkimi i hershëm me karton të kuq i Jack Hendry e pengoi atë të vlerësonte siç duhet formacionin që u aktivizua kundër zviceranëve. “Shpresoj që nesër të mund të tregojmë atë që kemi ushtruar gjatë ditëve të fundit të përgatitjeve, atë që treguam gjatë 60 minutave në Slloveni, dhe thjesht të përpiqemi të arrijmë fitoren e parë. Do të ketë disa ndryshime, por jo shumë. Ndoshta para përgatitjeve ishte planifikuar të kishte më shumë ndryshime, sepse donim të zhvillonim një ndeshje të mirë bazuar në atë që përgatitëm për dy ndeshjet e para dhe të merrnim konfirmimin e duhur”, përfundoi selektori i Skocisë.