Rrahmani: Protesta solli rezultate dhe gjunjëzoi Qeverinë, tani radhën e ka Kuvendi

Deputeti i Kuvendit të Kosovës, Eman Rrahmani, ka dalë me një reagim publik pas vendimit të ekzekutivit për të bërë ndryshime në Ligjin për Dhomat e Specializuara. Sipas Rrahmanit, tubimi protestues ka arritur qëllimin e tij, ndërsa ka përdorur tone të forta duke theksuar se Qeveria është tërhequr para kësaj pakënaqësie. Tutje, ai ka bërë thirrje që fokusi dhe trysnia publike të zhvendoset menjëherë drejt legjislativit, me qëllim që nisma ligjore të kalojë procedurat dhe të vijë sa më parë për miratim në seancë plenare. “Protesta e dha efektin te Qeveria! Ajo u dorëzua!”, ka shkruar ndër të tjera Rrahmani në reagimin e tij. Në lidhje me qëndrimin e tij personal, ai ka konfirmuar se do t'i japë mbështetjen e plotë projektligjit sapo ai të vijë për shqyrtim në sallën e Kuvendit. “Unë do të votoj PËR! Do të jetë vota me peshën më të madhe të ndërgjegjes që kam dhënë gjatë katër mandateve të mia si deputet”, u shpreh ai. Në fund, Rrahmani ka nënvizuar se tashmë barra dhe përgjegjësia kryesore i takon Kuvendit dhe secilit deputet veç e veç për të marrë vendimin e duhur.