Trajneri i Spanjës, Luis de la Fuente, shmang me diplomaci pyetjet për situatën e Cristiano Ronaldos te Portugalia

Strategu i Kombëtares së Spanjës, Luis de la Fuente, ka preferuar të ruajë distancën dhe të mos përfshihet aspak në debatin e krijuar rreth situatës aktuale të Cristiano Ronaldos dhe Përfaqësueses së Portugalisë. Gjatë paraqitjes para mediave, ai u vu përballë një pyetjeje hipotetike se si do të kishte vepruar po rrethanat e një krize të ngjashme do ta kishin gjetur atë në krye të stoli portugez. Përgjigjja e kreut të stafit teknik spanjoll ishte e matur dhe e kujdesshme. De la Fuente nënvizoi se është e pamundur të flasësh për një vendimarrje të caktuar kur nuk zotëron informacion të plotë, duke shtuar se çdo gjykim apo qëndrim duhet t'i paraprihet nga njohja e saktë e ngjarjeve reale. Këto deklarata tekniku spanjoll i bëri në konferencën për shtyp në prag të duelit të nesërm kundër Republikës Çeke, i vlefshëm për xhiron e tretë të Ligës së Kombeve të UEFA-s. “Është e qartë se nuk mund të flas për këtë çështje apo të jap një mendim për të, sepse nuk kam informacion dhe të dhëna të mjaftueshme. Spekulimet dhe supozimet nuk janë në natyrën time dhe nuk më pëlqen të jap gjykime pa i ditur faktet”, u shpreh ai. Më tej, ai shtoi: “Sipas mendimit tim, çdo situatë duhet të trajtohet kur ajo realisht ndodh. Dhe siç thoshte gjithmonë njëri prej mentorëve të mi: çdo situatë ka natyrën e saj të veçantë dhe duhet të trajtohet në përputhje me natyrën e saj”. Në këtë mënyrë, trajneri i Spanjës bëri të qartë se nuk ka ndërmend të vihet në rolin e një kolegu tjetër për të vlerësuar vendime të marra në rrethana që ai vetë nuk i njeh në detaje. I ngacmuar sërish nga gazetarët nëse kishte ndonjë ide se si duhej menaxhuar rasti i Ronaldos, De la Fuente u përgjigj shkurt: “Sinqerisht, nuk e di”, përpara se të shtonte me vendosmëri: “Dhe siç thashë, nuk mund të japësh një përgjigje pa e ditur të vërtetën dhe atë që ka ndodhur në të vërtetë”. “Dhe fatkeqësisht, kjo është e gjitha që mund të them”, përfundoi fjalën e tij ai. Me këtë qasje, De la Fuente i dha fund çdo mundësie për të komentuar hipotezat rreth krizës mes sulmuesit portugez dhe kombëtares së tij, duke vendosur që i gjithë fokusi të mbetet te sfida e radhës ndaj Republikës Çeke.