Kurti pret diplomatin e ri francez, Jean-François Huchet: Theksi te bashkëpunimi ekonomik dhe rruga evropiane e Kosovës

Kryeministri i Republikës së Kosovës, Albin Kurti, ka mirëpritur në një takim njoftues ambasadorin e ri të Francës në vendin tonë, Jean-François Huchet. Gjatë takimit, kreu i ekzekutivit i dëshiroi diplomatit francez shërbim sa më të mbarë dhe suksese në përmbushjen e përgjegjësive të tij të reja, ndërsa shprehu vlerësimin për ecurinë e shkëlqyer të raporteve bilaterale dhe arritjet e deritanishme që kanë forcuar partneritetin mes Prishtinës zyrtare dhe Parisit. Diskutimet u përqendruan te mundësitë e zgjerimit të këtij partneriteti strategjik, duke veçuar përgatitjet për Lojërat Mesdhetare 2030, si dhe investimet e mundshme në sektorë kyçë sikurse janë energjia, teknologjia e informacionit dhe zhvillimi i infrastrukturës. Temë bosht e bisedës ishte edhe procesi i integrimit evropian të Kosovës. Me këtë rast, kryeministri Kurti kërkoi nga Parisi zyrtar që të vazhdojë mbështetjen e fuqishme për hapat e mëtejmë të vendit drejt familjes evropiane. Në mbyllje të takimit, kryeministri rikonfirmoi vullnetin e plotë institucional për një bashkëpunim të ngushtë e të frytshëm me ambasadorin Huchet gjatë gjithë periudhës së mandatit të tij në Kosovë.