Afera e diskotekës "Pulse": Zgjatet masa e paraburgimit edhe për 30 ditë për Dejan Jovanov

Gjykata Themelore Penale në Shkup ka marrë vendim për vazhdimin e masës së paraburgimit për 30 ditë për Dejan Jovanovin (D.J.) nga Koçani, i cili është i dyshuari kryesor në kuadër të hetimeve për rastin e njohur si "Pulse". Kjo masë u caktua pasi gjykatësi i procedurës paraprake aprovoi kërkesën e Prokurorisë Themelore Publike për Ndjekjen e Krimit të Organizuar dhe Korrupsionit. Vendimi erdhi pas dëgjimit të të dyshuarit në praninë e avokatit të tij mbrojtës dhe pas analizimit të hollësishëm të provave dhe fakteve të dorëzuara. Sipas organit të akuzës, vendimi për paraburgim u bazua në rrezikun e arratisjes së të dyshuarit, si dhe në frikën e themeluar se ai mund të pengojë rrjedhën e hetimeve duke ushtruar ndikim te dëshmitarët. Periudha e re e paraburgimit do të hyjë në fuqi më 3 tetor 2026, duke qenë se D.J. ndodhet tashmë në paraburgim për shkak të hetimeve që lidhen me tragjedinë e zjarrit në diskotekën "Pulse". Në kuadër të këtij hetimi të ri, Dejan Jovanov dyshohet zyrtarisht për kryerjen e veprës penale "Dhënia e ryshfetit", e sanksionuar sipas nenit 358, paragrafit 1 të Kodit Penal.