Robertson tregon ndryshimet rrënjësore mes epokës së Klopp dhe metodave të Slot te Liverpooli

Mbrojtësi i majtë i Liverpoolit, Andy Robertson, ka ndarë me publikun detaje interesante rreth qasjeve të ndryshme që kanë pasur trajnerët Jürgen Klopp dhe pasardhësi i tij, Arne Slot, gjatë punës me skuadrën angleze. Sipas futbollistit skocez, holandezi Arne Slot i kushton një rëndësi të jashtëzakonshme të dhënave shkencore dhe analizave. Robertson tregon se trajneri i ri u larsua nga metodat e vjetra duke sjellë me vete një staf të specializuar, ku analisti Ruben përcillte çdo lëvizje në fushë përmes pajisjeve digjitale. “Arne Slot ishte vërtet i fiksuar pas statistikave. Ai solli njeriun e tij, Ruben, i cili ishte gjithmonë me iPad në dorë,” u shpreh Robertson, duke shtuar se edhe kur ekipi shfaqte ritëm të lartë apo realizonte shumë sprintime në seancat stërvitore, stafi teknik ndërhynte vazhdimisht për të monitoruar ngarkesën fizike. Në kontrast me këtë qasje moderne dhe të detajuar statistikore, Robertson kujton se periudha e drejtuar nga gjermani Jürgen Klopp bazohej tërësisht te besimi i verbër te identiteti i skuadrës dhe forca e grupit. Mentaliteti i Kloppit përqendrohej te parimi se nëse lojtarët ekzekutonin detyrat e tyre në mënyrën e duhur, asnjë kundërshtar nuk do të mund t'i ndalte. “Jürgen Klopp ishte gjithmonë në stilin: Nëse bëjmë këtë, askush nuk mund të na ndalojë. Ishte më shumë për ne, pa u fokusuar te kundërshtari,” shtoi mbrojtësi, duke bërë të qartë dallimin filozofik mes dy epokave. Sa i përket aspektit taktik gjatë ndeshjeve, Robertson shpjegoi se nën drejtimin e Slot, Liverpooli studion imtësisht pikat e forta dhe të dobëta të kundërshtarëve për të gjetur zgjidhje alternative, ndërsa Klopp preferonte t'i qëndronte besnik vetëm skemës së tij të lojës, pavarësisht emrit të kundërshtarit. “Me Arne Slot, ne gjithmonë e analizonim më shumë kundërshtarin, duke parë se si do të luanim për të dalë nga taktikat e tyre. Arne Slot thoshte gjithmonë: Shikoni, nëse ata bëjnë këtë…, atëherë ne bëjmë këtë, ndërsa Jürgen Klopp i qëndronte planit të tij. Ne nuk ndryshonim kurrë nën drejtimin e Klopp, ndërsa Arne Slot përshtatej vazhdimisht me taktikat e kundërshtarit,” përfundoi ai.