Pranvera Hyseni përfaqëson Kosovën në konferencën e planetariumeve në SHBA

Astronomja nga Vushtrria, Pranvera Hyseni, është ftuar në konferencën SEPA 2026 në Shtetet e Bashkuara të Amerikës, ku do ta mbajë fjalimin qendror të mbrëmjes gala. Para një audience profesionistësh që ia kanë kushtuar karrierën planetariumeve, Hyseni do të flasë për Kosovën dhe për rrugëtimin drejt realizimit të planetariumit dhe observatorit të parë në vend. Ajo do të tregojë se si një ide, e cila dikur dukej e largët për një vend si Kosova, u shndërrua në një projekt të rëndësishëm për zhvillimin e astronomisë dhe edukimin shkencor. “E kështu pra përfaqësohet Kosova! Sinqerisht, nuk ka krenari më të madhe”, ka shkruar Hyseni, duke shprehur emocionet për këtë paraqitje të rëndësishme ndërkombëtare.