Nga triumfi në “Fadil Vokrri” te sfida në Vjenë: Kosova nis përgatitjet për përballjen me Austrinë

Pasi arkëtoi fitoren me rezultatin minimal 1-0 kundër Irlandës, Përfaqësuesja e Kosovës nuk ka humbur kohë dhe është hedhur menjëherë në punë për sfidën e radhës në kuadër të Ligës së Kombeve. Të dielën në mbrëmje, “Dardanët” do të masin forcat me Austrinë në tokën austriake, në kryeqytetin Vjenë, duke luajtur kështu ndeshjen e dytë të këtij cikli garues. Gjatë seancës stërvitore të kësaj dite, trajneri Franco Foda ka pasur nën urdhra 16 lojtarë, ndërkohë që futbollistët që u aktivizuan si titullarë në ballafaqimin me irlandezët janë kufizuar në ushtrime rigjenerimi brenda ambienteve të hotelit. Pas triumfit të arritur në stadiumin “Fadil Vokrri”, gjendja shpirtërore dhe morali në gjirin e ekipit kosovar janë në nivelet më të larta të mundshme. “Atmosfera në kampin dardan është pozitive dhe energjia është në nivelin më të lartë. Tashmë, i gjithë fokusi është te përgatitjet për sfidën e së dielës në Vjenë”, bëhet e ditur përmes një njoftimi të lëshuar nga Federata e Futbollit të Kosovës. Synimi i Kosovës është që të ruajë ecurinë e mbarë edhe jashtë fushe ndaj austriakëve, në një tjetër ndeshje vendimtare për Ligën e Kombeve. Një ndeshje e re, një sfidë e re – e njëjta zemër për Kosovën!