Vitia: Mbi 53 për qind e rasteve të kancerit të gjirit u zbuluan në fazë të hershme gjatë 2025-ës

Ministri i Shëndetësisë, Arben Vitia, ka vënë në pah domosdoshmërinë e kapjes në kohë të sëmundjes së kancerit të gjirit, duke njoftuar se përgjatë vitit 2025, 53.4 për qind e pacienteve të prekura janë konstatuar në fazën e parë dhe të dytë të saj. Këto deklarata kreu i shëndetësisë i bëri gj ceremonia e ndarjes së pakove onkologjike, në kuadër të fushatës së ndërgjegjësimit “Tetori Rozë”, ku mori pjesë së bashku me ushtruesen e detyrës së presidentes, Albulena Haxhiu. Me këtë rast, ai shprehu mirënjohjen për mantelbardhët për angazhimin e tyre të pandërprerë në kujdesin ndaj grave që po luftojnë me këtë betejë, duke çmuar angazhimin e ekipeve mjekësore që nga faza e parë e diagnostikimit, te mjekimi, e deri te procesi i rindërtimit të gjirit. Po ashtu, ministri përgëzoi organizatat joqeveritare që kontribuojnë në vetëdijesimin e femrave, me theks të veçantë shoqatën “Jeta Vita”, si dhe gazetarët për transmetimin e vazhdueshëm të thirrjeve mbi vlerën e kontrolleve mjekësore periodike. Sipas tij, zbulimi në fazat filluese jo vetëm që rrit ndjeshëm shanset për shërim të plotë, por edhe zbut ndjeshëm pasojat shëndetësore që sjell kjo sëmundje. “Sa i rëndësishëm është vetëkontrolli, sa i rëndësishëm është identifikimi në fazat e hershme, ku edhe trajtimi është shumë i suksesshëm, por edhe pasojat janë shumë më të vogla”, u shpreh Vitia. Në fjalën e tij, ai u bëri thirrje publike të gjitha grave që të mos i anashkalojnë vizitat mjekësore dhe të kërkojnë ndihmë profesionale për çdo lloj shqetësimi që mund të vërejnë në trupin e tyre. Vitia shtoi se rrëfimet e grave që kanë përfunduar me sukses mjekimin pasi janë diagnostikuar në kohë, flasin qartë për peshën që ka fushata e vetëdijesimit dhe kontrolli i rregullt mjekësor. “Kontrollohuni dhe çdo ndryshim, qoftë më i vogli që ju mund të dyshoni, konsultojeni me profesionistët shëndetësorë, të cilët do të jenë çdoherë aty për t’ju përgjigjur në fazat e para”, përfundoi ai.