Shqyrtimi i 55 ankesave: Këshilli i Mediave të Shkruara merr vendimet e radhës

Këshilli i Mediave të Shkruara të Kosovës (KMShK) ka mbajtur mbledhjen e radhës, gjatë së cilës ka shqyrtuar një total prej 55 ankesash të adresuara në këtë institucion. Pas shqyrtimit të detajuar, anëtarët e Kuvendit të KMShK-së kanë marrë vendim që shtatë prej tyre të aprovohen, dy të pranohen pjesërisht, pesë të refuzohen, kurse 41 ankesa të tjera janë shpallur të patrajtueshme. Këto konteste gazetareske kishin të bënin me pretendimet për shkelje të disa prej kapitujve kryesorë të Kodit të Mediave të Shkruara të Kosovës. Konkretisht, palët pretendonin shkelje të Kapitullit II që lidhet me raportimin e së vërtetës, Kapitullit IV për të drejtën për t’u përgjigjur, Kapitullit V që trajton personat e përfshirë në incidente, aksidente, të arrestuar apo të akuzuar për vepra penale, si dhe Kapitullit VII që rregullon çështjet e privatësisë dhe mbrojtjes së burimeve. Në kuadër të vendimeve të miratuara, KMShK i ka dhënë të drejtë ankesës së S. B., e cila u përfaqësua nga avokati Amer Alija, drejtuar kundër mediumit Kojshiashow.com për artikullin e titulluar “Esat Shala me lot në sy: Zbulon politikanin e njohur që e solli në Kosovë S.B., i cili kreu maskra! Tronditet moderatori!”, duke konstatuar shkeljen e Kapitullit II për raportimin e së vërtetës. Po ashtu, është miratuar ankesa e N. K. kundër Nacionale.com lidhur me shkrimin “Çka premtonte Kurti për AKP-në dhe si erdhi në krye motra e Milot Kelmendit, pjesë e grupit të WhatsApp-it me Nagip Krasniqin”, ku u konstatua po ashtu shkelja e Kapitullit II të Kodit. Këshilli ka aprovuar edhe ankesën e B. T. ndaj Sinjali.com për shkrimin “Ndalohet Diart Bytyqi në lidhje ngjarjen në Prizren, emër i njohur për organet e drejtësisë”, duke vërtetuar shkeljen e Kapitullit VII që ka të bëjë me mbrojtjen e privatësisë. Një tjetër ankesë e miratuar ndaj po të njëjtit medium, Sinjali.com, ishte ajo e A. T. L. për artikullin “’Ekskluzive | Tiketa e trafikut eskalon në përleshje me Policinë në Kaçanik – njëri dyshohet se goditi policin me grusht, tjetri i kërcënoi: ‘Do t’ju vras’”, ku u konstatua sërish shkelja e Kapitullit VII për privatësinë. Sa i përket ankesës së E. D. kundër Asistionline.com, ajo u miratua për një seri shkrimesh me titujt ”3x3shi i FBK-së: Shumë turne e shumë fjalë, por Kosova vetëm sa për pjesëmarrje”, “Tarahenja në Taranto!”, “Sekretarja e FBK-së në Taranto, basketbolli kosovar drejt kolapsit?” “Tarahenja në Taranto = Hajgarallëk” dhe “Tentimi për ta zhvendosur debatin nuk i zhduk pyetjet: faktet dhe dokumentet flasin”, ku u gjet shkelje e kapitujve II dhe IV të Kodit. KMShK ka dhënë dritën jeshile edhe për ankesën e Kabinetit të Ushtrueses së Detyrës së Presidentes së Republikës së Kosovës kundër Ekonomiaonline.com për artikullin “Haxhiu për protestat e paralajmëruara: nëse janë për Specialen, opozita duhet të kërkojë falje”, duke konstatuar shkeljen e Kapitullit II. Ndërkaq, ankesa e E. A. ndaj Sinjali.com për shkrimin “’Ekskluzive | Sekretari i Shoqatës së Gjuetisë ‘Drenica’ theret në gjoks e këmbë në Skenderaj – dy të dyshuarit arratisen’”, u miratua pasi u konstatua shkelja e kapitujve V dhe VII, që mbulojnë prezumimin e pafajësisë dhe mbrojtjen e privatësisë. Në fund të këtij procesi shqyrtimi, Këshilli ka marrë vendim që të aprovojë pjesërisht edhe ankesën e kompanisë Barileva Turist Sh.P.K. kundër Indeksonline.net.