Kosova para sfidës presidenciale: Numërohen mbrapsht ditët për marrëveshje, rreziku i zgjedhjeve të reja shtohet

Krerët e subjekteve politike në Kosovë po përballen me orët më vendimtare për arritjen e një konsensusi rreth zgjedhjes së shefit të ri të shtetit. Afati i fundit skadon më 6 tetor, dhe nëse palët nuk arrijnë një kompromis deri atëherë, vendi rrezikon seriozisht të zhytet sërish në një cikël të ri zgjedhjesh parlamentare. Ky afat kohor është përcaktuar prerazi nga Gjykata Kushtetuese, e cila gjatë javës së shkuar konfirmoi se periudha 60-ditore për zgjedhjen e presidentit ka nisur zyrtarisht që nga momenti i konstituimit të Kuvendit. Megjithëse udhëheqësit e partive kanë shprehur publikisht se nuk dëshirojnë zgjedhje të parakohshme, deri më tani nuk është konfirmuar asnjë tryezë e përbashkët bisedimesh që do t'i jepte fund këtij ngërçi institucional. Në këtë linjë, kryeministri dhe njëherësh kryetari i Lëvizjes Vetëvendosje, Albin Kurti, ka paralajmëruar nisjen e kontakteve intensive me përfaqësuesit e opozitës. “Posa të përfundojmë me takimin që kemi sot me presidenten e Komisionit Evropian, zonjën Ursula von der Leyen, menjëherë do të fillojmë komunikimet për takime me krerët e opozitës, në mënyrë që të mos jemi pa Kuvend më 7 tetor, por më së largu deri më 6 tetor ta kemi presidentin apo presidenten e re”, ka deklaruar Kurti. Ndërkohë, Partia Demokratike e Kosovës ka shfaqur gatishmëri për dialog rreth kësaj çështjeje, por ka kushtëzuar qëndrimin e saj me një kërkesë të qartë politike: ndryshimin e Ligjit për Dhomat e Specializuara. Kjo parti kërkon kufizimin e kohëzgjatjes së mandatit të Gjykatës Speciale, si dhe një mekanizëm monitorimi ndërkombëtar për veprimtarinë e saj. Po ashtu, propozimi i PDK-së parasheh që disa prej lëndëve të krimeve të luftës të kalojnë për trajtim pranë organeve të drejtësisë brenda vendit. Këto kërkesa vijnë si pasojë e zhvillimeve dhe vendimeve të fundit lidhur me ish-krerët e Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi. Në anën tjetër, Aleanca për Ardhmërinë e Kosovës vazhdon të qëndrojë pa marrëveshje me Vetëvendosjen. Ky subjekt politik ka refuzuar ftesat për takime nga Kurti, duke insistuar në plotësimin paraprak të kërkesave të veta, ndër të cilat veçohet projekti i gazit amerikan. Sa i përket Lidhjes Demokratike të Kosovës, ajo mbetet e vetmja forcë opozitare me të cilën Vetëvendosje kishte arritur paraprakisht një pajtim rreth emrit të kandidatit për president. Megjithatë, kjo kandidaturë e Bekim Sejdiut u tëodh pasi gjashtë deputetë nga radhët e LDK-së u rreshtuan kundër saj, duke bërë të paqartë sigurimin e 80 votave të domosdoshme gjatë dy rundeve të para të votimit në Kuvend. Çfarë ndodh pas 6 tetorit? Nëse nuk arrihet zgjedhja e presidentit deri më 6 tetor, Kosova do të drejtohet pashmangshëm drejt një procesi të ri zgjedhor. Sipas kritereve kushtetuese, zgjedhjet e reja do të duhet të organizohen jo më vonë se data 15 nëntor. Një skenar i tillë do të prodhonte një tjetër palë zgjedhjesh brenda një hapësire kohore tejet të ngushtë. Kujtojmë se Kosova ka mbajtur zgjedhje në shkurt të vitit të kaluar, në dhjetor për shkak të pamundësisë për të formuar ekzekutivin, si dhe në qershor të këtij viti pas dështimit të Kuvendit për të zgjedhur kreun e shtetit. Tani, partitë politike kanë mbetur vetëm me pak ditë në dispozicion për të shmangur një tjetër ciklkus të lodhshëm zgjedhor.