Krizë në arsimin francez: 3 mijë nxënës të ndaluar, dhuna përfshin shkollat në mbarë vendin

Vala e protestave të nxënësve të shkollave të mesme në Francë ka marrë përmasa shqetësuese, duke u shndërruar në përleshje të dhunshme në disa qytete. Si pasojë e kësaj situate, të cilën autoritetet e kanë cilësuar si “dhunë urbane”, qeveria po shqyrton mundësinë e kalimit të mësimit në platforma online, me qëllim garantimin e sigurisë për nxënësit dhe personelin arsimor. Kryeministri Sébastien Lecornu ka urdhëruar anulimin e të gjitha udhëtimeve të planifikuara për anëtarët e kabinetit qeveritar, duke thirrur një mbledhje urgjente të enjten, më 1 tetor, për të menaxhuar krizën. Protestat, të cilat filluan si një lëvizje lokale në rajonin e Parisit, tashmë janë përhapur në të gjithë territorin francez. Ministri i Arsimit, Édouard Geffray, pritet të zhvillojë një takim me përfaqësuesit e nxënësve këtë të premte, më 2 tetor, në përpjekje për të gjetur një zgjidhje. Sipas të dhënave zyrtare të policisë, janë regjistruar rreth 900 incidente dhe bllokada në afërsi të institucioneve arsimore, ndërsa mbi 160 shkolla janë detyruar të mbyllin dyert. Gjithashtu, rreth 30 kampuse universitare, përfshirë ato në Paris dhe Marsejë, janë bllokuar nga protestuesit. Ministria e Brendshme bën me dije se numri i nxënësve të ndaluar, të moshës 15 deri në 18 vjeç, ka arritur në 3,000 që nga fillimi i protestave, ku 1,949 prej tyre janë ndaluar vetëm gjatë së enjtes. Deri më tani, raportohet për mbi 300 policë të plagosur, si dhe dhjetëra të lënduar në radhët e zjarrfikësve, mësuesve dhe nxënësve. Pakënaqësia e nxënësve buron nga një sërë problematikash, si: ngarkesa e madhe mësimore, klasat e mbipopulluara, mungesa e stafit pedagogjik dhe infrastruktura e degraduar. Një pikë tjetër e kritikave ka qenë edhe përballimi i temperaturave ekstreme gjatë valëve të të nxehtit të këtij viti. Për të vënë situatën nën kontroll, në shumë qytete është angazhuar policia e trazirave, ndërkohë që të lënduarit kanë pësuar kryesisht nga hedhja e objekteve të forta ose nga mjetet e përdorura për shpërndarjen e turmave. Ndërkohë, Ministria e Brendshme ka hapur një hetim zyrtar pas akuzave për përdorim të tepruar të forcës ndaj tre nxënësve gjatë ndërhyrjeve policore. Situata ka degraduar në disa raste deri në djegie koshash mbeturinash dhe akte zjarrvënieje. Si shembull i pasojave të rënda, një shkollë në Nantes do të mbetet e mbyllur për një muaj për shkak të dëmeve të mëdha të shkaktuara nga zjarri.