Kosova lë pas festën e fitores, nis intensivisht stërvitjet për sfidën e madhe ndaj Austrisë

Pas triumfit minimal 1:0 kundër Irlandës, Përfaqësuesja e Kosovës ka lënë menjëherë pas festimet për t'u përqendruar te detyrat e radhës në Ligën e Kombeve. "Dardanët" i janë rikthyer fushës së blertë pa humbur kohë, pasi në horizont duket përballja e vështirë kundër Austrisë, e cila konsiderohet edhe si skuadra favorite e grupit. Gjatë seancës stërvitore të zhvilluar këtë të premte, trajneri Franco Foda ka pasur në dispozicion 16 lojtarë. Ndërkohë, futbollistët që mbajtën barrën kryesore dhe u aktivizuan nga minuta e parë ndaj irlandezëve, kanë zhvilluar vetëm një seancë rigjenerimi në hotel, me synim rikuperimin e plotë fizik pas harxhimit të madh energjetik në ndeshjen e së enjtes. Në kampin kosovar mbretëron një atmosferë tejet optimiste. Nisja e suksesshme e këtij edicioni me tri pikë të plota ka rritur ndjeshëm moralin dhe motivimin e grupit, por i gjithë fokusi është zhvendosur tashmë te dueli i ardhshëm. Përfaqësuesja e Kosovës do të udhëtojë drejt Vjenës, ku të dielën do të matë forcat me austriakët në një tjetër provë të rëndësishme për këtë cikël garash. Pas mbrëmjes magjike në stadiumin "Fadil Vokrri", skuadra synon të shfaqë të njëjtën dëshirë, karikim dhe energji pozitive edhe në udhëtimin e vështirë në tokën austriake.