Kosova ndan pikët me Izraelin në Debrecen, ‘Dardanët’ ruajnë pozitën në tabelë

Përfaqësuesja e Kosovës ka mbyllur me barazim pa gola sfidën e zhvilluar në Debrecen kundër Izraelit, e vlefshme për xhiron e tretë në kuadër të Grupit B3 të Ligës së Kombeve. Gjatë pjesës së parë, loja ishte e hapur me raste nga të dyja palët. Rastin më serioz për Kosovën e krijoi Lumbardh Dellova, goditja e të cilit nga distanca u neutralizua nga portieri kundërshtar. Në anën tjetër, gardiani Amir Saipi dëshmoi siguri duke ndalur një goditje të rrezikshme të izraelitëve, ndërsa një tentativë tjetër e vendasve përfundoi jashtë kuadratit. Fraksioni i dytë i lojës nisi me një qasje më agresive nga ana e Kosovës. Muharrem Jashari testoi reflekset e kundërshtarit me një gjuajtje të fuqishme, ndërsa pak minuta më pas, Valmir Matoshi humbi një mundësi ideale për të zhbllokuar rezultatin. Izraeli u kundërpërgjigj me një rast të artë, por sërish Amir Saipi u tregua vendimtar, ndërsa një tjetër tentativë me kokë e mbrojtjes izraelite përfundoi jashtë portës. Në 10 minutat e fundit, trajneri i Kosovës hodhi në fushë Edon Zhegrovën, i cili shtoi dinamikën në sulm. Megjithatë, organizimi defansiv i Izraelit ishte i pakalueshëm, duke bërë që rrjetat të mbeten të paprekura deri në vërshëllimën përfundimtare. Pas këtij rezultati, Kosova vazhdon të mbajë pozitën e dytë në tabelë me katër pikë, aq sa ka edhe Irlanda në vendin e tretë, ndërsa për Izraelin ky barazim shënon pikën e parë të fituar në këtë grup.