Thirrje e fortë nga Uashingtoni: Wesley Clark kërkon lirimin e menjëhershëm dhe kthimin e Thaçit në Kosovë

Ish-komandanti i forcave të NATO-s, gjenerali Wesley Clark, ka ngritur një shqetësim të fortë lidhur me funksionimin e Dhomave të Specializuara, duke kërkuar kthimin e menjëhershëm të ish-presidentit Hashim Thaçi dhe bashkëluftëtarëve të tij në gjirin e familjeve dhe të shoqërisë kosovare. Gjatë një prononcimi të tij, ai nënvizoi se shtetet evropiane duhet të tregojnë respekt të plotë ndaj qytetarëve të Kosovës dhe sakrificës së tyre sublime për liri e parime demokratike, duke e cilësuar Hashim Thaçin si viktimë të një mekanizmi të padrejtë gjyqësor. “Europa duhet të respektojë popullin e Kosovës, që luftuan për parimet. Millosheviçi ka qenë përgjegjës. Ai ishte një person që donte të promovonte spastrimin etnik. Hashim Thaçi është viktimë dhe kjo është gabim”, u shpreh Clark, i cili dëshmoi se kishte kërkuar në rrugë zyrtare dëshmi që mbështesin akuzat ndaj ish-liderit kosovar, por nuk kishte hasur në ndonjë provë konkrete. Duke bërë një krahasim me të kaluarën, ish-komandanti amerikan solli në vëmendje periudhën e konfliktit të armatosur dhe Tribunalin e Hagës për ish-Jugosllavinë, të cilin e vlerësoi si një instancë më të drejtë dhe më të bazuar në fakte reale sesa gjykata aktuale speciale. “Mendoj se ishte, sepse në atë kohë kishte prova të vërteta për veprimet e gabuara që u bënë. Ne parashtruan informacione në atë kohë. Arrestuan disa kriminelë lufte. Mendoj se gjykata ka marrë fund. Le të rikthejmë Hashim Thaçin dhe të tjerët në Kosovë, dhe të kthehen në jetën e tyre. Të ecim përpara. Hashim Thaçi ka kaluar 5 vite në paraburgim. Mjaft me kaq“, tha ai mes të tjerash. Në lidhje me një mundësi të tillë, nëse do të ishte i gatshëm të dëshmonte para trupit gjykues të Apelit për t'i dalë në krah ish-krerëve të Ushtrisë Çlirimtare të Kosovës, gjenerali Clark la të kuptohet qartë se do ta priste një ftesë të tillë me gatishmëri të plotë. “Do e vlerësoja shumë nëse do më ftonin për të shpjeguar se çfarë ndodhi“, përfundoi ai.