Skandali i shantazhit në Prishtinë: Dëshmitari rrëfen në gjykatë se i dha rreth 200 mijë euro Fatmir Shehollit

Gjatë seancës gjyqësore të mbajtur të enjten në Gjykatën Themelore në Prishtinë, në procesin ndaj të pandehurit për spiunazh dhe shantazh, Fatmir Sheholli, është dëgjuar dëshmitari dhe pale e dëmtuar, Arben Jetullahu. Ai ka paraqitur para trupit gjykues detaje tronditëse, duke pohuar se ka transferuar shuma të konsiderueshme parash që kapin shifrën e rreth 200 mijë eurove te i akuzuari, pasi ky i fundit e kishte shantazhuar me publikimin e një videoje. Jetullahu ka sqaruar para gjykatës se gjatë periudhës kur Sheholli ndodhej në paraburgim, i kishte kërkuar mbështetje financiare për familjen e tij, kërkesë të së cilës i ishte përgjigjur duke i dërguar 500 euro. Megjithatë, situata kishte marrë një kthesë tjetër kur i akuzuari kishte nisur t'i dërgonte mesazhe kërcënuese dhe shantazhuese përmes bashkëpunëtorit të të dëmtuarit, Lorik Retkoceri. Sipas dëshmisë së tij, prej asaj kohe ai ishte detyruar t'i paguante të pandehurit një pagë mujore prej 1 mijë eurosh, duke arritur në një total prej 13 mijë eurosh, ndërkohë që Sheholli figuronte formalisht si punëtor i tij. Ai theksoi se këtë skemë e kishte parë si një mundësi për të “blerë paqen” dhe për të shmangur publikimin e lajmeve të rreme rreth biznesit të tij, materiale që kishin dëmtuar rëndë imazhin dhe veprimtarinë e tij tregtare. Dëshmitari po ashtu ka shtuar se i akuzuari i kishte kërkuar një huazim prej 60 mijë eurosh për blerjen e një banese, me premtimin se borxhi do të shlyhej përmes shitjes së një lokali në Podujevë ose duke ia kaluar lokalin në pronësi. “Asnjë obligim prej tina nuk më është kthy… Në momentin që ma ka dërgu porosinë prej paraburgimit, e kam ndi veten të kërcënum dhe të shantazhum sepse porosia ishte kërcënuese dhe shantazhuese”, ka deklaruar ai në sallën e gjyqit. Duke folur për mënyrën e komunikimit, Jetullahu ka përmendur se kontakti mbahej ekskluzivisht përmes bashkëpunëtorit të tij Retkoceri dhe djalit të të akuzuarit, pasi nuk kishte pasur asnjëherë kontakte direkte me Shehollin apo familjen e tij. Ai ka konfirmuar se bëhej fjalë për një video komprometuese dhe se i ishte bërë e qartë se në mungesë të pagesave materiale, ajo do të bëhej publike, ndonëse vetë ai nuk ka dijeni të saktë mbi përmbajtjen e saj, duke e cilësuar si diçka me karakter personal. I dëmtuari ka ritheksuar se në llogarinë e të akuzuarit janë derdhur rreth 200 mijë euro në total, transaksione të cilat janë kryer përmes bankës në bazë të marrëveshjeve verbale. Sipas bindjes së tij, Sheholli i ka keqpërdorur mediat si mjet presioni dhe shantazhi, megjithëse nuk zotëron prova të drejtpërdrejta për këtë pretendim. Në përfundim të dëshmisë së tij, Jetullahu ka bërë të ditur se mbetet i vendosur në ndjekjen penale të rastit dhe se do të konsultohet ngushtë me avokatin e tij për hapat e mëtejshëm lidhur me kërkesën për kompensimin e dëmit të pësuar.