Gëzim në familjen Statovci: Deputetja e Vetëvendosjes bëhet nënë për herë të parë

Deputetja e Kuvendit të Kosovës nga radhët e Lëvizjes Vetëvendosje, Jeta Statovci, ka përjetuar emocionet e para të amësisë, duke sjellë në jetë fëmijën e saj të parë. Për ta ndarë këtë moment të veçantë me ndjekësit, ajo ka zgjedhur rrjetet sociale, ku ka publikuar një mesazh prekës kushtuar të birit, të cilit i ka vënë emrin simbolik Det. “E gëzofsh jetën, Det! Ti erdhe i vogël, por solle me vete pafundësinë. Një botë të re. Një dashuri pa brigje. Një kuptim tjetër të Jetës”, ka shkruar deputetja në dedikimin e saj emocional. Në urimin drejtuar vogëlushit, Statovci ka shprehur dëshirën që rrugëtimi i tij në jetë të jetë i qetë dhe i mbushur me horizonte të gjera e të reja. Po ashtu, ajo ka përdorur këtë mundësi për të falënderuar publikisht stafin mjekësor të Klinikës së Gjinekologjisë në Qendrën Klinike Universitare të Kosovës, duke vlerësuar përkushtimin dhe profesionalizmin e tyre gjatë gjithë procesit të lindjes.