Limaj nga protesta “Jo në emrin tim”: Nevojitet konsensus i gjerë dhe ndryshim urgjent i ligjit të Speciales

Kryetari i Nismës Socialdemokrate, Fatmir Limaj, ka marrë pjesë në protestën e organizuar në shesh nën moton “Jo në emrin tim”, ku ka bërë thirrje që pakënaqësitë dhe shqetësimet rreth veprimtarisë së Gjykatës Speciale të materializohen në hapa të prekshëm institucionalë dhe shoqërorë. Sipas tij, situata e krijuar kërkon domosdoshmërisht një bashkim të forcave politike, intelektuale dhe mbarëpopullore, pasi siç u shpreh ai, kjo gjykatë ka dështuar të ofrojë drejtësi të mirëfilltë, duke cenuar të drejtat dhe duke prodhuar padrejtësi. Duke vënë theksin te koha e veprimit, kreu i Nismës vlerësoi se nisma e parë dhe më urgjente në këtë drejtim duhet të jetë ndërhyrja për plotësim-ndryshimin e ligjit aktual që rregullon funksionimin e kësaj gjykate. Këto komente u bënë gjatë tubimit të sotëm në shesh, ku qytetarë dhe figura publike shprehën hapur pakënaqësitë e tyre lidhur me vendimet dhe mandatin e këtij institucioni të drejtësisë.