Rruga evropiane e Shqipërisë, Parisi rikonfirmon mbështetjen e palëkundur për zgjerimin e BE-së

Ministri për Evropën dhe Punët e Jashtme, Ferit Hoxha, ka zhvilluar një takim zyrtar me të Dërguarin e Posaçëm të Francës për Ballkanin Perëndimor, René Troccaz, në kuadër të vizitës së tij në Przno të Malit të Zi. Në qendër të këtij takimi të rëndësishëm ishin hapat e mëtejshëm të Shqipërisë drejt anëtarësimit në Bashkimin Evropian, situata aktuale dhe dinamikat në Ballkanin Perëndimor, si dhe domosdoshmëria e thellimit të bashkëpunimit rajonal, ndërlidhjes dhe sigurisë së përbashkët. Nëpërmjet një reagimi në platformën sociale X, kryediplomati Hoxha vlerësoi lart partneritetin e shkëlqyer mes Tiranës zyrtare dhe Parisit, i cili mbështetet mbi vlera të përbashkëta evropiane, duke vënë në pah rolin kyç që Franca luan në mbështetjen e integrimit tonë. “Mbështetja e vazhdueshme e Francës për rrugëtimin evropian të Shqipërisë, si dhe angazhimi i saj aktiv për një proces zgjerimi të besueshëm dhe të bazuar në meritë, kanë rëndësi strategjike jo vetëm për Shqipërinë, por edhe për të ardhmen e Ballkanit Perëndimor dhe të Evropës në tërësi”, ka shkruar ai. Po ashtu, Hoxha theksoi se vendi ynë mbetet plotësisht i përkushtuar për të bashkëpunuar ngushtë me palën franceze me qëllim konsolidimin e stabilitetit, garantimin e sigurisë dhe finalizimin e këtij procesi. “Mbetemi të vendosur të punojmë ngushtë me Francën për të forcuar perspektivën evropiane të rajonit, për të konsoliduar stabilitetin dhe sigurinë, si dhe për ta afruar në mënyrë të vendosur dhe të pakthyeshme Ballkanin Perëndimor me Bashkimin Evropian”, u shpreh ai.