Skandali i videove intime, Aurela Gaçe paralajmëron padi: Dinjiteti im nuk është objekt përbaltjeje

Këngëtarja e njohur shqiptare, Aurela Gaçe, ka thyer heshtjen pas aludimeve të fundit në rrjet, të cilat e lidhnin emrin e saj me publikimin e pretenduar të disa videove intime. Ajo ka mohuar me forcë çdo lidhje me këto materiale, duke theksuar se do të ndjekë rrugën ligjore për të mbrojtur emrin dhe integritetin e saj nga ato që i cilëson si shpifje të ulëta. "Ditët e fundit po shoh emrin tim të përfshihet në lajme e aludime të pabazuara. Përballë shpifjeve që cenojnë dinjitetin tim, nuk mund të hesht," ka deklaruar artistja, duke shtuar se marrëdhëniet e saj me autorë të ndryshëm të industrisë muzikore kanë qenë gjithmonë rreptësisht profesionale dhe nuk i japin askujt të drejtën të fabrikojë histori apo të nxisë thashetheme. Duke qenë e prerë në qëndrimin e saj, Gaçe përsëriti se nuk ka asnjë lidhje me videot për të cilat aludohet në media dhe rrjetet sociale, ndërsa vuri në dukje rolet e saj si bijë, nënë dhe bashkëshorte, duke kërkuar që jeta dhe figura e saj të respektohen. Në mesazhin e saj, ajo u shpreh gjithashtu në mbështetje të çdo gruaje apo vajze që përballet me poshtërim dhe cenim të privatësisë, duke bërë të qartë se liria e shprehjes nuk nënkupton liri për të shpifur dhe se çdo pretendim i rremë do të marrë përgjigjen e merituar në institucionet e drejtësisë.