Ultimatumi i shoqërisë civile: Partitë politike duhet të zgjedhin Presidentin më së voni deri më 6 tetor

Një koalicion prej mbi 40 organizatash të shoqërisë civile i ka drejtuar një thirrje urgjente subjekteve politike parlamentare, duke kërkuar angazhim të menjëhershëm për arritjen e një konsensusi që do t'i hapte rrugë zgjedhjes së Presidentit ose Presidentes së Kosovës deri më 6 tetor, konform afateve të përcaktuara nga Gjykata Kushtetuese. Përmes një deklarate publike të përbashkët, sektori civil ka nënvizuar se vendi domosdoshmërisht ka nevojë për mekanizma shtetërorë plotësisht funksionalë dhe me mandat të plotë, të cilët janë të aftë të përmbushin obligimet e tyre karshi qytetarëve. Sipas vlerësimeve të tyre, pamundësia për të zgjedhur kreun e shtetit rrezikon seriozisht të prodhojë shpërndarjen e Kuvendit dhe thirrjen e zgjedhjeve të parakohshme, duke zhytur sërish vendin në një cikël të ri paqartësish dhe paralizimi institucional. “Dështimi i sërishëm për të zgjedhur Presidentin/en do të sillte shpërndarjen e Kuvendit dhe zgjedhje të reja”, thuhet shprehimisht në deklaratë. Nënshkruesit e këtij apelimi rikujtojnë se Kosova tash e dy vite po funksionon me kapacitete të kufizuara ose thjesht në detyrë, ndaj çdo bllokadë e re do të bënte që kriza institucionale dhe paqëndrueshmëria politike të thellohen edhe më tej. Shoqëria civile u ka bërë apel si bllokut të shumicës parlamentare ashtu edhe forcave opozitare që të tregojnë fleksibilitet për kompromis. Nga mazhoranca kërkohet gatishmëri ndaj profileve që mund të gjejnë mbështetje më të gjërë ndërpartiake, ndërsa nga opozita priten propozime konkrete dhe përkushtim për një zgjidhje të zbatueshme. “Arritja e marrëveshjes për Presidentin/en kërkon kompromis të ndërsjellë”, shtohet tutje në dokument. Aktorët e shoqërisë civile u bëjnë thirje palëve që të tejkalojnë pozicionet e tyre fillestare dhe të akordohen sa i përket emrit të kandidatit, sigurimit të kuorumit dhe mbështetjes parlamentare për ta përmbyllur suksesshëm këtë proces brenda afatit ligjor. Sipas tyre, finalizimi i këtij procesi në përputhje të plotë me Kushtetutën do t'i mundësonte vendit të dalë nga ngërçi aktual, duke u dhënë mundësi institucioneve tona që të vijojnë normalisht punën e tyre. Në fund, organizatat e shoqërisë civile kanë konfirmuar vullnetin e tyre për të dhënë kontributin në këtë drejtim, përmes lehtësimit të mundshëm të tavolinave të diskutimit, teksa u bëjnë thirrje partive që gjatë ditëve në vijim të ndërmarrin hapa konkretë drejt një marrëveshjeje përfundimtare. Këtë deklaratë e kanë mbështetur dhe firmosur dhjetëra organizata të rëndësishme, ndër të cilat KDI, D+ (Demokraci Plus), D4D, Instituti GAP, IKD, GLPS, KMDLNj, QKSS, Rrjeti i Grave të Kosovës, FOL, Riinvest, ÇOHU!, Germin, Handikos dhe shoqata të tjera të shoqërisë civile.