Liga e Kombeve: Gjyqtari gjerman confrohet me sfidën e madhe mes Kroacisë dhe Anglisë

Arbitri gjerman Sven Jablonski, i cili në jetën e përditshme ushtron profesionin e punonjësit të bankës, do të ndajë drejtësinë në sfidën mes Kroacisë dhe Anglisë. Ky duel i vlefshëm për xhiron e tretë të Ligës së Kombeve është planifikuar të zhvillohet këtë të shtunë, duke filluar nga ora 18:00, në stadiumin e Rijekës. Për Jablonskin, kjo do të jetë hera e parë që udhëheq si gjyqtar kryesor një ndeshje të kombëtares ose klubeve kroate. E vetmja pikëtakim e mëparshme e tij me futbollin e këtij vendi daton në vitin 2023, kur shërbeu si zyrtar i sistemit VAR në finalen e Ligës së Kombeve mes Kroacisë dhe Spanjës, e cila u luajt në qytetin e Roterdamit. Gjatë karrierës së tij të pasur, referi gjerman ka drejtuar më shumë se 275 takime zyrtare. Statistikat e tij tregojnë një mesatare prej 3.94 kartonësh të verdhë dhe 0.07 kartonësh të kuq direkt për çdo ndeshje. Në portofolin e tij profesional spikatin disa nga përballjet më të rëndësishme në Gjermani, si finalja e Kupës së vendit mes Bayern Mynihut dhe Stuttgartit, si dhe klasiket e tensionuara mes bavarezëve dhe Borussia Dortmundit. Ndërkaq, në arenën ndërkombëtare, ai ka gjykuar pesë sfida të Ligës së Kampionëve, përfshirë përballjen e fundit ndërmjet Barcelonës dhe Feyenoordit, si dhe finalen e Kampionatit Evropian për grupmoshat U-19. Një tjetër detaj interesant lidhet me rigorozitetin e tij në zonën e rreptësisë. Në 127 ndeshje të zhvilluara në Bundesliga, Jablonski ka akorduar mesatarisht një penallti në çdo ndeshje të katërt, duke treguar pikën e bardhë të 11-metërshit në 31 raste deri më tani.