Zgjedhja e presidentit në udhëkryq, Nagavci bën thirrje për unitet dhe strategji mbarëkombëtare

Koha në dispozicion për të arritur një konsensus rreth zgjedhjes së shefit të ri të shtetit është ngushtuar ndjeshëm, duke lënë vetëm 11 ditë afat para se Kosova të drejtohet sërish drejt kutive të votimit. Ky shqetësim është ngritur nga kryetarja e Grupit Parlamentar të Lëvizjes Vetëvendosje, Arbërie Nagavci, e cila ka theksuar domosdoshmërinë e shmangies së zgjedhjeve të reja përmes veprimeve unike institucionale. Duke folur para mediave pas përfundimit të mbledhjes së Kryesisë së Kuvendit, Nagavci u shpreh e bindur se kryeministri Albin Kurti do t'i shfrytëzojë të gjitha mundësitë dhe kompetencat e tij ligjore për të garantuar konstituimin e plotë të institucioneve të vendit. Ajo paralajmëroi se shumë shpejt do të bëhen të ditura hapat dhe takimet e ardhshme për këtë çështje kyçe. “Besoj se shumë shpejt kryeministri Kurti do të bëjë të qartë takimet e radhës se si duhet të adresohen. Ju e dini se ka qenë në një diskutim zyrtar ku ka paraqitur edhe qëndrimet e tij e të shtetit të Kosovës në takime të rëndësishme, por besoj që edhe në këtë periudhë të mbetur, ashtu sikurse deri më tani prapa, pra që nga certifikimi i rezultateve të zgjedhjeve, kryeministri Kurti, kryetari i Lëvizjes Vetëvendosje do të bëjë gjithçka që është në mandatin e tij, besoni, që të kemi institucione funksionale të zgjedhim presidentin edhe të shmangim, të shmangim zgjedhjet e reja”, deklaroi ajo. Në këtë kontekst, zyrtarja e lartë e Vetëvendosjes ka vënë theksin te rëndësia e tejkalimit të interesave ngushtësisht politike, duke kërkuar një qasje serioze shtetërore larg çdo lloj protagonizmi personal apo partiak. “Sikurse thashë, nga sot ne kemi vetëm 11 ditë që të zgjedhim presidentin e vendit, përndryshe do të shkojmë në zgjedhje të reja. Në këtë pikë është tejet e rëndësishme që si shtet çështjet që janë të rëndësishme t’i adresojmë me një strategji të mirëfilltë shtetërore, pa protagonizma”, u shpreh ajo tutje. Lidhur me nismën e ndërmarrë nga Partia Demokratike e Kosovës për një projektligj të ri, që erdhi pas vendimit të fundit të Gjykatës Speciale, Nagavci bëri të ditur se deputetët e shumicës parlamentare, por edhe subjektet e tjera politike, nuk kanë qenë aspak pjesë e konsultimeve paraprake. “Natyrisht se ne do të japim kontributet tona, por duhet të përmendet që askush, me sa unë jam në dijeni, nga Lëvizja Vetëvendosje, pra qoftë nga deputetët, qoftë nga kolegët bashkëpunëtorët tanë, nuk janë konsultuar në lidhje me këtë nismë të PDK-së. Pra, kjo duhet të jetë një nismë që na bashkon të gjithëve. Dhe ashtu sikurse veç e përmenda, jo vetëm që askush nga partitë, jo vetëm nga Lëvizja, por me sa e kuptova edhe nga partitë e tjera parlamentare nuk janë konsultuar në lidhje me këtë nismë. Me aq sa kam dëgjuar përfaqësuesin e PDK-së ka deklaruar që është një grup i ekspertëve, disa ekspertë, që nuk e di kush janë që kanë dhënë kontributet e tyre. Por, ajo që është e rëndësishme është që, me sa unë jam në dijeni, as ekipet mbrojtëse të katër krerëve të UÇK-së nuk janë konsultuar në lidhje me këtë projektligj”, përfundoi Nagavci.