Berisha nga Strasburgo: Kontrolli qeveritar mbi mediat e ka shndërruar pluralizmin në një fasadë

Kryetari i Partisë Demokratike, Sali Berisha, gjatë fjalimit të tij në Asamblenë Parlamentare të Këshillit të Europës në Strasburg, ka ngritur shqetësime të thella lidhur me gjendjen e lirisë së shprehjes dhe demokracisë në Shqipëri. Ai theksoi se mbi 90 për qind e hapësirës mediatike, duke përfshirë informimin ditor, debatet dhe opinionet, ndodhet nënnënshtrimin e drejtpërdrejtë të ekzekutivit dhe oligarkëve të lidhur me pushtetin. Sipas liderit të opozitës, pakica e vogël e mediave të pavarura përballet çdo ditë me përndjekje, sulme verbale e fizike ndaj gazetarëve, si dhe me gjobëvënie të rënda e shkatërrim pronësor nga ana e zyrtarëve të lartë shtetërorë. Berisha vuri në dukje se të gjitha rekomandimet e adresuara nga organizmat ndërkombëtare për këtë çështje janë shpërfillur hapur nga qeveria. Duke analizuar situatën, ai u ndal te koncepti i “sundimit përmes gjuhës”, duke e cilësuar atë si një teknologji të fshehtë dominimi që synon të mbyllë shtigjet e mendimit të lirë. Sipas tij, kur gjuha manipulohet dhe shndërrohet në instrument pushteti, kontrata mes shoqërisë dhe të vërtetës thyhet, duke e reduktuar pluralizmin politik në një dukuri thjesht burokratike dhe fiktive. Duke cituar filozofin Ludwig Wittgenstein se “kufijtë e gjuhës sime tregojnë kufijtë e botës sime”, Berisha u shpreh se në Shqipëri fjalët përdoren për të ngritur mure, për të sulmuar kundërshtarët dhe për t'ia faturuar çdo faj opozitës, ndërkohë që vendi funksionon si një narkoshtet. Në mbyllje të fjalës së tij, kreu i Partisë Demokratike bëri thirrje për një reagim të prerë ndërkombëtar, përfshirë vendosjen e sanksioneve ndaj strukturave të narkoshtetit, të cilat i konsideroi si kusht të panegociueshëm për të rikthyer lirinë e medias dhe demokracinë e vërtetë në Shqipëri.