Përplasje në Konferencën e Kryetarëve: Dështon konsensusi për mocionin me debat mbi Vlora Hysenin, vendimi kalon në Kuvend

Krerët e grupeve parlamentare të Partisë Demokratike dhe Partisë Socialiste nuk kanë arritur të gjejnë një gjuhë të përbashkët gjatë mbledhjes së kësaj të enjteje në Konferencën e Kryetarëve. Çështja në diskutim ishte kërkesa e opozitës për zhvillimin e një mocioni me debat lidhur me ish-drejtoreshën e SHISH, Vlora Hyseni, ku mungesa e një dakordësie paraprake ka bërë që miratimi i kësaj kërkese të kalojë për vendimmarrje përfundimtare në seancën plenare të Kuvendit. Gjatë fjalës së saj në këtë mbledhje, deputetja e opozitës, Jorida Tabaku, kërkoi që kryeministri Edi Rama të paraqitet për të dhënë llogari rreth rrethanave të emërimit të Vlora Hysenit në krye të Shërbimit Informativ Shtetëror, duke e cilësuar këtë si një çështje me interes thelbësor kombëtar dhe jo thjesht si një debat partiak. Tabaku solli në vëmendje rëndësinë e fushës së mbrojtjes dhe sigurisë, ndërsa kritikoi ashpër mënyrën se u thirr mbledhja e Këshillit të Sigurisë pa praninë e përfaqësuesve të opozitës. Ajo e quajti këtë vendim të njëanshëm dhe mungesë transparence, duke shtuar se tryezat e mbledhura nga të njëjtët persona që kishin mundësi ta parandalonin apo monitoronin situatën më parë, e bëjnë edhe më emergjent një debat të hapur parlamentar. Më tej, ligjvënësja demokrate u ndal te diferencimi mes çështjes që po heton Prokurorët e Posaçme dhe kërkesave të opozitës, duke sqaruar se SPAK po verifikon faktin nëse shtetasja Vlora Hyseni ka ndihmuar shtetasin Ergys Agasi – i akuzuar për disa vepra penale – përmes furnizimit me të dhëna dhe informacione të klasifikuara, ndërsa kërkesat e tyre politike kanë një objekt tjetër. Në përfundim të fjalës së saj, Tabaku theksoi se kreu i qeverisë duhet detyrimisht të japë përgjigje para qytetarëve dhe institucionit, duke paralajmëruar se Kuvendi nuk duhet të shërbejë në asnjë mënyrë si mburojë politike.